Премиерот Христијан Мицкоски најави суштински пресврт во здравствениот сектор, нагласувајќи дека Владата презема реформи кои не биле спроведени со децении, вклучително и проширувањето на позитивната листа на лекови.
- Тоа што ние го правиме во здравствениот сектор е нешто што не се случувало со години, па и со децении би рекол, вклучително и проширувањето на позитивната листа. Очекуваме во месеците што следуваат нови убави вести за македонските граѓани со нови лекови што ќе бидат вклучени на позитивната листа, рече Мицкоски.
Премиерот упати сериозен апел за одговорно однесување кон здравствениот систем, укажувајќи на недозволиви злоупотреби и нерационално исцрпување на ресурсите.
„Ние како Влада ќе сториме сè што е во наша моќ да ги заштитиме интересите на граѓаните и државата, но очекуваме такво однесување буквално од сите. Во здравството се пишуваат дежурства за 31 работен ден во февруари, со 24 часа работа, а истовремено да очекуваме да вложуваме во здравството. Ќе треба и ние многу повеќе да водиме сметка за општиот интерес и интересот на граѓаните“, дециден е Мицкоски.
© Vecer.mk, правата за текстот се на редакцијата
