Урбанистите кога решавале каде и што ќе се гради заборавиле што учеле на факултет и дека во тие згради треба да живеат луѓе и во услови на добро, но и на лошо. Оттаму, па потоа, потекнуваат безбедносните проблеми со кои се соочуваат стотици згради само во Скопје.
Украдени противпожарни црева, неисправност на хидрантската мрежа, попречени излези за евакуација со мебел или заградени од страна на станари…. се дел од неисправностите што ги пријавиле управителите на станбените објекти откако од општинските инспекциски служби добија задолжение да достават информација за неопходната противпожарна опрема во станбените згради.
По истекување на рокот за доставување на податоците од страна на управителите или заедниците на станари, а кои според податоците што МИА ги доби од пет скопски општини, истекува до крајот ма март, се очекува инспекторите да извршат контрола на станбените објекти со цел да проверат дали добиените податоци соодветствуваат со фактичката состојба на терен.
Потоа, секоја општина, ќе треба да достави записници од извршените контроли до ЗЕЛС и тие ќе може да бидат дадени на увид на јавноста. Ќе им се даде одреден рок на управителите на станбените згради да ги поправат недостатоците и неправилностите доколку се констатираат.
Недостастува опрема, но што е со погрешно поставените згради и доградби?
Еден од клучните проблеми кој не може да се отстрани е безбеден и брз пристап до зградите од страна на противпожарни возила.
Имено, урбанистите во општините дозволувале градби на згради до кои таков пристап не е можен, било поради лошо планирани патишта, глема близина на зградите една до друга разделени со тесен пат само за пешаци, паркинзи кои попречуваат пристап, дивоградби од гаражи и недопустливи доградби кои попречуваат пристап во случај на пожар... За тоа дека многу од зградите изградени последниве децении немаат воопшто противпожарни скали и излез во случај на оапсност сведок е секој граѓанин.
Во зградите кои се градени во комунизмот, според сите законски прописи, како во Грдаски ѕид или Капиштец каде се задоволени потребните услови пристапот до противпожарни скали е заграден за свои лични потреби, летна кујна или остава за непотребни ствари и точаци.
Градоначалникот на Општина Карпош, Стевчо Јакимовски во изјава за МИА нагласува дека интересот кај граѓаните е голем и дека ваква контрола била направена и во 2022 година.
– Ние почнавме со контроли пред ЗЕЛС да донесе било каква одлука, а ние таква контрола сме направиле и во 2022 година. Одѕивот по станбените згради е извонреден. Треба да исконтролираме речиси 1.500 влезови, а ние досега имаме преку 300 влезови, меѓутоа интересот е голем и кај самите граѓани – вели Јакимовски.
Во изјава за медиумите дадена минатата недела Јакимовски информира дека во неговата општина само во една зграда состојбата одговара согласно законот.
– Општина Карпош има 820 згради и околу 1500 влезови. Досега одговориле 330 и уште 259 се јавиле на нашите телефони за дополнителни инструкции. Има 41 противпожарен апарат. Во 18 станови има исто така противпожарни апарати, има апарати за СО2 за гасење на пожар од електрична инсталација, има еден специјален систем за гасење пожари и панични светла итн. Само една зграда во Карпош е онака како што треба, како што бара законот, а тоа е зградата на Адора. За жал, за другите не можеме истото да го кажеме – рече Јакимовски.
Од Општина Центар не посочија што недостасува во станбените објекти од опремата за заштита од пожари. Потенцираат дека од спроведената акција и дополнителната инспекција на терен, податоците ќе бидат предадени на соодветните служби за оние станбени згради каде ќе бидат утврдени неправилности кои нема да бидат отстранети во одреден рок.
И од Општина Чаир не посочуваат дали досега се утврдени неправилности, затоа што, како што велат, уште траат инспекциските контроли. По завршувањето на анализата и добиените информации од состојбата на терен, ќе се објават детални информации за констатираната состојба вклучително и нерегуларностите онаму каде што ќе се најдат. Доколку се утврдат прекршувања на Законот за домување, велат од оваа општина, ќе следуваат соодветни санкции.
© Vecer.mk, правата за текстот се на редакцијата
