Оние кои ги следат јавните настани знаат дека синдикатот е со децении под контрола на СДСМ и токму затоа, во време кога СДСМ ја има власта како изминатите седум години пред ланските избори, нема генерални штрајкови.
Штрајковите на синдикатот се “резервирани“ со децении само кога владата ја предводи ВМРО ДПМНЕ, како логистика на опозицискиот СДСМ заедно со нивниот партиски “невладин“ сектор за кој и докумнетирано видовме колку е и “невладин“, и колку е платен, а од скоро и формално “невладиниот сектор“ е дел од врвното раководство на СДСМ.
Наједноставен начин да се делува од страна на Синдикатот е - бараме поголеми плати. Нема држава во светот, ниту синдикат во светот, кој тоа не го бара но, малкумина штрајкуваат и внесуваат дестабилизација во општеството.
Дестабилизација затоа што пред нешто да се бара, треба точно да се анализира дали е тоа можно и остварливо без да се внесат потреси во стопанството. Може да се бараат не 500, туку 1.000 евра минимална плата но, дали има кој да го плати тоа а компаниите да опстанат без отпуштања од работа и откази како резултат на наметнати неодржливи трошоци.
Таква анализа и аргументација од Сојузот на синдикати - нема.
Што бара Синдикатот на СДСМ и ДУИ
Oд Сојузот на синдикати на Македонија(ССМ) денеска на протест побараа од пратениците во Собранието, од работодавачите во Стопанската комора и од Владата, да ја зголемат минималната плата на 500 евра, а останатите плати за 100 евра.
Рекоа дека доколку тоа не се случи, може да има генерален штрајк и протести.
„Конечно работниците излегоа на улица да бараат плата. Нападите кои ги упатуваат кон нас се само поради тоа што бараме достоинствени плати за достоинствен живот“, рече Слободан Трендафилов од ССМ.
Фрази на Синдикатот без податоци и анализи кои можат да се употребат во секоја држава и секоја прилика. Фрази кои може да ги каже секое дете на своите родители дека другите имаат а тие немаат, и дека треба да им се даде повеќе за да бидат достоиствени, без притоа да погледнат што е можно а што не е.
Најважно, Синдикатот не објавува проценка и анализа - колку откази следат ако се наметне минималец од 500 евра без за тоа да постојат економски услови кај работодавачите?!
Синдикалецот Трендафилов им се обрати на пратениците со „непочитувани“, додавајќи дека се дојдени пред Собранието да побараат од нив да донесат одлука минималната плата да изнесува не помалку од 500 евра и да се зголемат сите останати плати за 100 евра.
Убаво звучи за на секој да му се допадне. Но, има ли стопанството пари за зголемување плати на сите, или тоа е плански трик за обезбедување психолошка поддршка на Синдикатот. Податоците на ССМ велат дека во 2024та околу 26 илјади работници (од вкупно околу 700.000 вработени, околу 3-3,5%) земале минимална плата која изнесувала 22 500 денари. А во јавниот сектор, кој има далеку повисок просек на образование од комерцијаланиот сектор, од 130 илјади вработени, минималец добивале околу 5%, или околу 650 од вработените.
„Денеска дојдовме тука ние што одлучуваме во синдикатите дека платите се мизерни, вашите сега 79 проценти зголемени плати не ги заслужувате и затоа дојдовме тука поради фактот што вие не одлучувате за нас, ние ќе одлучиме за вас“, изјави Трендафилов.
Слободан Трендафилов, во емисијата „Трилинг“ : „Упадот се прави со политичка наредба и тоа се пресликува на локално ниво. Нив треба повеќе да ги загрижува што на локално ниво имаат избори за 5 месеци. Толку од целите и намерите на Синдикатот во ова време.
Владата веќе донесе одлука минималната плата да се зголеми за 1.812 денари.
Што велат бројките и можностите
Во светот минимални плати се договараат на тројни средби: Синдикат, Влада и Работодавци. Тоа е неопходно за да се балансира помеѓу можностите и желбите, да се утврди што и колку може да се покачи во однос на минималната плата а да не придонесе до откази после кои следат економски и социјални кризи.
Минималната нето плата во Македонија, во јануари оваа 2025 година, изнесувала 22.640 денари. Во комуникација со стопанствениците владата пресметала дека веќе од овој месец може да се смета на покачување на минималната плата за 1.812 денари со што минималната плата сега е 24.450 денари.
Просечната нето плата во Македонија, последниве три месеци, е околу 42.000 денари или, околу 700 евра. Просечната плата лани, во однос на реалниот коефициент плати/цени, е зголемена околу 4,5%, а номинално (како бројка) околу 9 проценти.
Сега, мининалната плата е скоро 60% од просечната плата. Таков сооднос е над рамките на вообичаен сооднос помеѓу минимална и просечна плата.
За да се зголемат минималните плати потребен е раст на бруто домашниот прозвод, потребно е економијата да расте за да издржи зголемување на минималната плата. Оваа влада е на власт само девет месеци и веќе имаме зголемен раст на бруто домашниот производ кој се очекува да биде 3-3,5%. Согласно растот на економијата, од овој месец минималната плата е веќе зголемна за 8% (1812 денари) во однос на ланската.
Никој не може да спори дека растат цените на основните услуги и производи, но растат околу 6% годишно, а минималецот од април е зголемен за 8%. Цените не зависат само од работодавците и македонските компании, а уште помалку од владата, туку, околу 60% од цените се диктирани од странство, со увоз на стоки, услуги и енергенси на што Македонија нема влијание и контрола.
Лани, во 2024та увезени се стоки, услуги и енергенси во вредност од 11 милијарди евра, а извозт е 7,7 милијарди евра. Под владата на СДСМ, лани извозот паднал 6,6%, а дури од оваа 2025та година, после подолг период, извозот почнува да расте. Во јануари извозот пораснал за 5,1%. За прв пат, по неколку години, имаме и економски раст над регионалниот просек. Патем, оваа влада наследи инфлација од над 5% од минатата влада на СДСМ и рекореден државен долг во историјата на Македонија, инфлацијата и државниот долг сега се намалауваат, а поминаа само три месеци од годинава.
Со ова темпо, од првите три месеци годинава, следи намалување на невработеноста за 10% и раст на просечната плата за околу 10%.
Тоа е работа на владата, а минималните плати се работа на договор помеѓу работодавачите, стопанството, и работниците. Владата тоа може само да го нормира во закон и пропис.
Премиерот Мицкоски потврди дека минималната плата од 500 евра од април е прифатлива за Владата, но само доколку за тоа се постигне договор со работодавачите преку Економско-социјалниот совет.
Сепак, Мицкоски го отфрли предлогот на опозицијата Владата да субвенционира до 30.000 денари, тврдејќи дека тоа е доказ дека Синдикатот станал партиска бина на СДСМ, ДУИ и „Левица“ и делува во корист на нивниот партиски рејтинг и интерес без оглед на реалната состојба.
Владата ниту може, ниту смее, да додава пари од буџетот за плати на вработени претежно во приватни компании. Тоа ниту една влада во светот не го прави.
Дали сето ова го знаат во Сојузот на синдикатите? Секако дека го знаат. Но, се доближуваат локалните избори, економската политика на владата веќе дава резултати, со што и онака нискиот рејтинг на СДСМ и ДУИ опаѓа па, што не можат СДСМ и ДУИ на свој грб за нив треба да одработат Синдикатот и “невладините“ организации.
Дали се сеќаваат дека “економска локомотива“ на СДСМ требаше да биде одгледување марихуана и рекордно зголемување на даноците, што и се случуваше под таа власт. Дали се сеќаваат како на РЕК Битола постојано “спонтано“ му се случувааа дефекти а паралелно со тоа експлодира регистрација на нови фирми за продажба на струја од увоз по три пати повисока цена од домашната, сите до последна во сопственост на фамилиите на функциоенри на СДСМ и ДУИ? Е сега Синдикатот работи за таква власт.
Дали се сеќаваат дека СДСМ и ДУИ од 2017 кога ја преземаа власта, до средината на 2024 го зголемија јавниот долг за повеќе од 2,5 милијарди долари, го донесоа над рекордни 60% од бруто домашниот производ, а немаше ниту една битна инвестиција во инфраструктура, енергетика или развојни цели. Па каде отидоа тие милијарди евра од зголемените долгови?
Отидоа во корупција и издржување на “логистиката“ на СДСМ и ДУИ - Синдикати и “невладин“ сектор кои на повик се подигаат кога СДСМ и ДУИ имаат криза или се доближуваат избори.
© Vecer.mk, правата за текстот се на редакцијата
