Одбраната на Дејан Давидовски Дешо, обвинет за упадот во Собранието на 27-ми април, а за кој шведскиот врховен суд не дозволи негова екстрадиција но тој сам се врати во Македонија, денеска побара изземање на судијата Илија Трпков поради пристрасност.
Ова е барањето за изземање на судечкиот судија:
I. ХРОНОЛОГИЈА
1.1. На 27 Ноември 2017 година од страна на Основното јавно обвинителство за гонење на организиран криминал и корупција Скопје донесена е Наредба за спроведување на истражна постапка КО бр. 66/17 против 35 лица меѓу кој е и обвинетиот Дејан Давитковски Дешо поради постоење на основано сомневање дека истите сториле кривично дело Терористичко Загрозување на уставниот поредок и безбедноста од чл. 313 од КЗ;
1.2. На ден 19 ти Февруари 2025 година Основното јавно обвинителство за гонење на организиран криминал и корупција Скопје до Основниот кривичен суд Скопје поднесе Обвинителен акт КО бр. 66/17 против Дејан Давитковски Дешо поради постоење на основано сомневање дека истите сториле кривично дело Терористичко Загрозување на уставниот поредок и безбедноста од чл. 313 од КЗ;
1.3. На 2 Април 2025 година, пред Основен кривичен суд Скопје закажана е расправа за предметот 3КOK-45/25.
II. ПРИЧИНИ ЗА ИЗЗЕМАЊЕ
2.1. Вршењето судски должности е специфична и многу чувствителена општествена или државна активност, особено во доменот на кривичната постапка, каде што се одлучуваат за значајни и мошне важни права на граѓаните, за нивната одговорност или виновност и за нивната слобода или правда! „Непристрасност на судот“ значи непостоење на „прејудицирање или наклонетост“ . За да се задоволи ова барање судот мора да се придржува и кон субјективниот и кон објективниот критериум или „Постоењето на независност и непристрасност“ за да би постоело правично судење согласно со Македонското право и правото на Совет на Европа. Субјективниот критериум значи дека во конкретниов случај судијата е ослободен од било какво претходно лично убедување, додека според објективниот критериум се утврдува дали судијата понудил доволно гаранции за да се исклучи било какво оправдано сомнение во овој поглед;
2.2. Во врска со субјективниот критериум, се поставува прашањето дали може според фактите да се докаже дека член на судот „дејствувал со лична наклонетост“ против обвинетиот . Во врска со ова, постои претпоставката дека судијата е непристрасен , се додека не се докаже поинаку . Ние сметаме дека судијата Илија Трпков во завршниот говор на предметот „ Организатори на 27 Април“ изнесе лична наклонетост со тоа што пред пошироката македонска јавност изјавил –
„ Теориите дека постоеле одлука на судот во Шведска за политички азил на еден од обвинетите од настаните од собранието .....обвинетиот кој се наоѓаше во Шведска се врати во Македонија и се води постапка против него...навистина не треба да ги мешаме овие наши пријателски земји со настаните во собранието и во тој контекст да носиме некои заклучоци...Вакви одлуки има низ сите држави во Европа, каков ќе беше одговорот на системот ако вакви настани со тепање парламентарци, кршење и демолирање се случеше во парламентот на Шведска ...можеме само да замислиме, но сигурно без разлика дали ќе беше третиран како терористичко загрозување на нивниот систем одговорот ќе беше брз, експедитивен и ќе имаше судска завршница...;
2.3. Според објективниот тест, мора да се утврди дали, освен личното однесување на судијата Илија Трпков , постојат факти кои можат да се утврдат и кои можат да предизвикаат сомнеж за неговата непристрасност. Во оваа смисла, дури и самите индикации можат да имаат одредена важност, особено во случаи кога судија се појавува повеќе од еднаш во ист кривичен правен настан (Hauschildt против Данска и Феј против Австрија, пресуда на ЕСЧП).
Имено, судијата Илија Трпков постапувал во предметот „Организатори на 27 Април“ и веќе се обидел да осуди лица за кривичното дело Терористичко загрозување на уставниот поредок и безбедноста, според истиот кривичен правен настан. Ова создава сомнеж за негова пристрасност и не дава никаква гаранција за фер постапка пред Основниот кривичен суд за обвинетиот.
2.4. Кредибилитетот на правдата која треба да се изрече во Основниот кривичен суд во Скопје дополнително се става под знак на прашање со закажување на расправи за 4 Април ,10 Април и 14 Април , сите во 10 часот , без притоа истите да бидат внесени во Судскиот календар на Основниот кривичен суд во Скопје.
Или судење на брза лента! Исто така сега обвинетиот веќе има добиено право на „политички азил“ во Европска држава , што самото по себе бара во оваа постапка Основниот кривичен суд во Скопје да ги почитува правата загарантирани со во Универзалната декларација на Обединетите нации од 1948 година и поткрепена со Конвенцијата од 1951 година во врска со статусот на бегалците и протоколот од 1967 година што се однесува на Статус на бегалци, како и Европската конвенција за екстрадиција од 1957 година. Врз основа на претходно изнесеното, а согласно со член 33 став 2 и 35 од Законот за Кривична постапка, се поднесува ова Барање за изземање на судијата Илија Трпков до претседателот на Основниот кривичен суд во Скопје.
© Vecer.mk, правата за текстот се на редакцијата
