Истечената банкарска картичка не треба да се чува или едноставно да се фрли – препораката е таа да се уништи со цел да се заштитат личните и финансиските податоци на корисникот.
Иако банките технички спречуваат употреба на картички со истечен рок, корисниците сепак имаат важна улога во заштитата од можни злоупотреби. Затоа, по истекот на рокот на важност, картичката треба физички да се уништи – најчесто со пресекување на пластиката, вклучувајќи ги чипот и магнетната лента.
Во банкарската пракса, ваквата обврска често е наведена и во договорите што издавачите на платежни картички (најчесто банките) ги склучуваат со своите клиенти. Со тоа се обезбедува дополнителна заштита на чувствителните податоци поврзани со картичката.
Во меѓувреме, компаниите за платежни картички постојано ги унапредуваат безбедносните системи и технологиите што спречуваат неовластена употреба, како на продажните места и банкоматите, така и при онлајн трансакциите. Сепак, и покрај напредните механизми за заштита, внимателното постапување на корисниците останува клучен фактор за безбедност.
Пораката од експертите е јасна: картичка со истечен рок не треба да се користи ниту да се чува, туку да се уништи, со што се намалува ризикот од потенцијална злоупотреба на податоците.
© Vecer.mk, правата за текстот се на редакцијата
