СДСМ вечерва го одбележа 35-от роденден со свечена седница на Централниот одбор, на која присуствуваа актуелни и поранешни партиски функционери, меѓу кои и Зоран Заев, Владо Бучковски и поранешниот генерален секретар Миле Зечевиќ.
Во обраќањето по повод јубилејот, претседателот на партијата Венко Филипче истакна дека 35 години од формирањето не се само повод за славење, туку и повик за нова, чесна и одлучна борба за праведна Македонија.
– СДСМ повторно излегува пред граѓаните со јасна определба за промени и враќање на власта таму каде што припаѓа – во рацете на граѓаните. Тргнуваме против оваа ненародна криминална предавничка власт, одново чисти, скромни, искрени и посоцијалдемократски од кога било досега – порача Филипче.
Тој нагласи дека партијата повторно стои пред голема историска и политичка задача – да ја врати надежта, правдата и европската перспектива на државата.
– Затоа СДСМ денес е тоа што бил и ќе биде секогаш – големата идеја за Македонија како пристојна, праведна и европска држава – истакна Филипче.
Прославата по повод 35-годишнината помина во атмосфера на единство, со пораки дека партијата влегува во нов политички циклус и подготовка за следните изборни предизвици.
На самата завршница на свеченоста, 5 минути пред крајот, се појави и поранешниот лидер на партијата Зоран Заев, откако веќе завршија сите говори и музичкиот дел од програмата.
Тоа е прво јавно појавување на поранешниот премиер по подолг период.
Кога ја здогледа Каја Шукова, рече „Шо праите бе, другари“.
На видеото може да се слушне како Заев се извинува за доцнењето, велејќи: „Извинете на доцнење сега, ама морав таму на промоција на тој филмот“.
Една сопартијка му вели дека го нема, а тој ѝ одговори „Не бе, тука сум јас, тука сум“.
© Vecer.mk, правата за текстот се на редакцијата
