Премиерот Христијан Мицкоски изјави дека нема да има данок за неженети и немажени лица во Македонија, појаснувајќи дека неговата претходна изјава е погрешно протолкувана.
Се разбира дека нема да има данок за немажени и неженети, изјави претседателот на владата, Христијан Мицкоски.
– Се извинувам на тие што погрешно ја продолкувале мојата иницијатива. Факт е дека сум исклучително загрижен за демографската состојба во државата. И факт е дека како претседател на владата, моја е одговорноста да бидам загрижен за демографската иднина на мојата татковина, затоа што јас сум претседател на владата кој што исклучително длабоко се занимава со демографијата и демографските движења. Она кое што можам да го заклучам е дека ние тивко исчезнуваме и изумираме – истакна Мицкоски.
Тој нагласи дека како премиер чувствува одговорност да зборува за демографските предизвици, потенцирајќи дека бројките се алармантни.
„Во 2016 година имавме 23.000 новородени, а во 2024 само 16.000 – тоа е пад од 30%. Кај браковите, од 13.300 во 2021, бројката во 2024 падна на 11.100, што е намалување од 17%“, посочи Мицкоски.
Според него, овие трендови не треба да се игнорираат, бидејќи населението „тивко исчезнува и тоа премолчено“.
© Vecer.mk, правата за текстот се на редакцијата
