Кандидатот за градоначалник на Конче, Златко Ристов ќе направи сè за жителите на Конче, за подобри услови за живот, рече денеска претседателот на ВМРО-ДПМНЕ, Христијан Мицкоски на митинг во Конче.
Мицкоски укажа дека е вообичаено да се стави акцент на локалните теми, но оти мора да се споменат непринципиелните коалиции.
– Треба да се гласа така за да се стави крај на корупцијата и корумпираните политичари. Корумпираните политичари кои не бираат средства да се дограбат до фотелјата, а истовремено ја омаловажуваат Македонија не треба да бидат на политичката сцена. Сетете се само какви понижувања им приредија на граѓаните и на Македонија – кажа Мицкоски.
Оттука, укажа Мицкоски, овие избори се помеѓу две опции – непринципиелна коалиција меѓу Венко, Али и Димче и од друга страна коалицијата предводена од ВМРО-ДПМНЕ која е за право, правда, достоинство, подобар живот.
– Значи или гласаме за назад кога се ограбуваше народот и државата, или за коалицијата која 15 месеци се бори да им врати сè на државата и на граѓаните. Затоа гласате за вас, вашето место, вашата иднина. Да излеземе масовно и да пратиме силна порака дека сме против ограбувањето на Македонија. Да излеземе и заедно да гласаме за број 9 – заклучи Мицкоски.
© Vecer.mk, правата за текстот се на редакцијата
