Зоран Башановиќ од Србија, лицето кое преку ПР агенцијата „Ај медиа“ го навредува македонскиот народ е куќен пријател на Зоран Заев во Грција, обвинува Валентин Манасиевски од ВМРО-ДПМНЕ на партиска прес-коференција.
Манасиевски вели дека екс-советникот земал плата од повеќе од 1.500 евра во времето на владеењето на Заев и дека „сличните луѓе си се наоѓаат едни со други“.
„Башановиќ и Милјан Шчекиќ од ‘Ај медиа’, од скопски хотел диригираат директно на Бихачка. Овие двајца се изворот на сите лаги, манипулации и невистини кои доаѓаат од СДСM и Филипче“, вели Манасиевски.
Според зборовите на Манасиевски, Зоран Башановиќ е естраден турбофолк менаџер и сопственик на телевизија во Србија, човек кој е апсен за крадење облека во САД.
„Тој е избркан од СНС затоа што склучувал милионски договори во сомнителни комбинации повикувајќи се на кумството со Александар Вучиќ“.
Според Манасиевски, станува збор за контроверзна личност, како и матна личност во областа на енергетиката.
„Зоран Башановиќ е кум на претседателот на Србија, Александар Вучиќ, со кој не се во најдобри односи, па оттаму, Башановиќ преку Зоран Заев, Венко Филипче и СДСМ го напаѓа СНС од Србија, како и претседателот Александар Вучиќ“.
ВМРО-ДПМНЕ обвинува дека сето ова се случува по насока на Заев, а Филипче и СДСМ говорат сè што ќе им напишат Башановиќ и Шчекиќ.
„Затоа повеќе не сме вчудоневидени од соопштенијата и прес-конференциите на СДСМ и Филипче во кои ги напаѓаат претседателот Вучиќ и владата во Србија“, тврди Манасиевски.
© Vecer.mk, правата за текстот се на редакцијата
