„Не праќаме емисари, ТРИКОВИТЕ НА ГРОФОТ ОД ЗАЈАС НЕ ПОМИНУВААТ НИТУ ВО ГРАДИНКА“

Емисари од ВМРО-ДПМНЕ до ДУИ не постојат, реагира партијата.

„Повод за оваа реакција е синоќешното излагање на Бујар Османи во Чаир, во кое тој изнесе измислици за наводни емисари од ВМРО-ДПМНЕ и сценарија што постојат само во неговата фантазија. Со вакви изјави, Османи се обидува да ја прикрие паниката во која се наоѓаат ДУИ и СДСМ пред сигурниот изборен пораз. Ситните трикови на грофот од Зајас не минуваат ниту во детска градинка“, соопшти партијата.

ВМРО-ДПМНЕ јасно и гласно порачува: единствените „емисари“ што ги праќаме се оние кои ја носат пораката на народот, а тоа е одговорност за криминалниот картел ДУИ-СДСМ, се додава во соопштението.

„Одговорност за Али, Заев, Филипче, Груби и Османи. Токму на локалните избори овие две структури конечно и формално ќе завршат таму каде што одамна им е местото, на буништето на историјата. Бујар Османи денес е ништо друго освен последниот портпарол на криминалниот картел кој граѓаните го препознаа. Но, неговата одбрана е залудна. Нема повеќе политичко мешетарење, нема пазари зад грбот на народот. Во октомври ќе има јасна пресуда, пресуда на граѓаните кои ќе ги испратат картелот на СДСМ и ДУИ во политичка пензија, а правдата ќе биде задоволена. Зошто таа има име и презиме, а одговорноста мора да се испорача“, реагира ВМРО-ДПМНЕ.

Кандидатот на ДУИ за градоначалник на Чаир, Бујар Османи синоќа рече дека изјавите на премиерот Христијан Мицкоски и неговите коалициски партнери дека ќе нема предвремени парламентарни избори знак на страв од сознанието дека се соочуваат со изборен пораз.

– Она што најмногу ми пречи е што премиерот продолжува со двојни пораки. Едни пред јавноста, други – испратени преку емисари. И тоа со пораки до нас, дека треба да се подготвиме за реконструкција на владата по изборите. Му порачуваме, и преку емисари, и јавно, дека Албанците не се монета за поткупување. Премиерот полека ја поминува црвената линија.Не знам дали е свесен кој нерв го допира кај Албанците, но јасно е дека допре до сржта на револтот и достоинството на луѓето – рече Османи.

Веднаш по овие избори, победниците кај Албанците ќе седнат и ќе преговараат за заедничко владеење, со цел да се откочат европските процеси и да се врати животот и економскиот просперитет, додаде Османи.