По денешната бура што ја зафати територијата на земјата, Центарот за управување со кризи (ЦУК) информира дека веднаш ги активирал своите механизми за следење и координација.
Директорот на ЦУК, Мухамет Али, ја следеше состојбата во текот на целиот ден и беше во континуирана комуникација со сите надлежни институции со цел навремено и ефикасно справување со последиците од невремето, соопшти ЦУК.
Според ЦУК, на неколку локации е регистрирана материјална штета – поплавени улици, паднати дрвја и сообраќајни бариери. Не се пријавени повредени лица.
Информирани се и надлежните служби за водоснабдување и канализација, противпожарната служба и Дирекцијата за заштита и спасување (ДЗС), кои се подготвуваат да постапат согласно нивната надлежност.
ЦУК ги повикува сите граѓани да останат будни и да ги следат препораките на надлежните служби, како и навремено да пријавуваат опасни или животозагрозувачки состојби на бројот за итни случаи 112.
© Vecer.mk, правата за текстот се на редакцијата
