Граѓаните и компаниите во банките чуваат вкупно 10,3 милијарди евра, додека вкупниот долг за кредити изнесува 8,7 милијарди евра, покажуваат податоците на Народната банка. Во октомври годинава се забележува значителен годишен раст на вкупните депозити од 11,8%, како и на вкупните кредити за 12,1%.
Порастот на депозитите, пред сè, се должи на зголемување на штедењето кај домаќинствата, додека растот на кредитите произлегува од зголемената побарувачка од корпоративниот сектор.
Кога станува збор за физичките лица, најголем интерес има за потрошувачките и станбените кредити. Потрошувачките кредити забележуваат годишен раст од 10,2%, додека станбените кредити бележат уште поголем раст од 16,1%. Овој тренд укажува на тоа дека граѓаните сè повеќе се ориентираат кон обезбедување финансиска сигурност и инвестиција во недвижен имот.
Од друга страна, кредитите за купување автомобили забележуваат благо намалување на годишно ниво од 1,9%, а кредитите одобрени преку кредитни картички се намалени за 6,8%. Исто така, негативните салда на тековните сметки и кредитите одобрени врз други основи покажуваат намалување од 8,4% и 9,5% на годишно ниво.
Ова значи дека македонските граѓани и компании во моментов најмногу се фокусираат на станбени и потрошувачки кредити, додека побарувачката за други видови заеми се намалува.
Експертите оценуваат дека ваквиот тренд ја отсликува економската состојба и навиките на населението – граѓаните се повеќе штедат, но и инвестираат во долгови кои обезбедуваат долгогодишна корист, како станбени кредити.
© Vecer.mk, правата за текстот се на редакцијата
