Ко-основачот на Мајкрософт, Бил Гејтс, предвиде дека напредокот во вештачката интелигенција значително ќе ја намали улогата на луѓето во традиционалните професии како што се медицината и образованието. Оваа голема промена би можела да се случи за помалку од десет години, посочи тој.
За време на неодамнешното интервју со комичарот Џими Фалон на „The Tonight Show“, Гејтс ја опиша иднината во која луѓето повеќе нема да бидат неопходни за повеќето задачи, бидејќи технологијата со вештачка интелигенција ќе ги извршува лесно, дури и за работи кои денес бараат специјализирани човечки вештини.
„Денес, експертизата во областите како медицината и образованието е ретка“, рече Гејтс, нагласувајќи дека квалитетната здравствена заштита и наставата зависат од „исклучителен лекар“ или „исклучителен учител“.
Според неговите предвидувања, сепак, во следната деценија „одличните медицински совети и супериорното учење“ ќе станат бесплатни и лесно достапни за секого благодарение на технологијата за вештачка интелигенција, пренесува New York Post.
Слободната интелигенција на иднината
Технолошкиот магнат и милијардер, чие богатство моментално се проценува на повеќе од 100 милијарди долари, подетално за оваа своја визија зборувал во разговор со Артур Брукс, професор од Харвард, кој е познат по истражувањето на среќата.
Гејтс, исто така, таму рече дека технологијата за вештачка интелигенција ќе биде сè поприсутна во секојдневниот живот, револуционизирајќи ги областите на здравството, дијагностиката и образованието.
„Ова е длабока промена, па дури и малку страшна, бидејќи се случува многу брзо и нема горна граница“, посочи тој.
Сојузник или закана за работните места?
Постојат различни мислења за тоа каква улога ќе имаат луѓето во општество управувано од вештачка интелигенција. Додека некои аналитичари веруваат дека вештачката интелигенција ќе им помогне на луѓето да станат попродуктивни и да отворат нови економски можности, други предупредуваат на нестабилноста на пазарот на трудот.
Директорот на секторот за вештачка интелигенција на Мајкрософт, Мустафа Сулејман, смета дека трансформацијата на работата со помош на вештачката интелигенција ќе има „екстремно дестабилизирачко“ влијание.
Во својата книга од 2023 година, Дојдениот бран, Сулејман пишува:
„Овие алатки само привремено ќе ја зголемат човечката интелигенција. Тие ќе не направат попаметни и поефикасни за одредено време и ќе отклучат огромен економски раст, но тие во суштина се алатки кои го заменуваат човечкиот труд“.
Иако признава дека вештачката интелигенција може да предизвика нарушувања во општеството, Гејтс останува оптимист. Тој истакнува дека вештачката интелигенција ќе донесе значителни откритија во медицинските третмани, климатските решенија и глобалното образование, дека ќе реши бројни проблеми, но дека некои работи ќе останат исклучиво човечки:
„Ќе има работи што ќе ги задржиме за себе“, му рече Гејтс на Фалон, додавајќи дека забавата сепак ќе биде во доменот на луѓето.
„Но, кога станува збор за производство, транспорт и одгледување храна, со текот на времето тие ќе станат решени проблеми“, заклучил Гејтс.
© Vecer.mk, правата за текстот се на редакцијата
