Румејса тргна на животно патување и се качи на лет од Истанбул до Сан Франциско. Летала за прв пат во животот, а за да го направи 13-часовното патување, екипажот на летот на Туркиш ерлајнс морал да отстрани шест реда седишта.
Поради состојба наречена сколиоза, Румејса не може долго да седи и морала да лежи на носила. Пред патувањето, таа зборувала со новинарите на аеродромот во Истанбул за тоа како се чувствува.
„Ова ќе биде мојот прв лет, како и моето прво патување во странство. Но, верувам дека ова искуство ќе биде прво за многу поединци, не само за мене. Бидејќи, како што знаете, можноста за патување на носилки обично е резервирана за пациенти кои се префрлаат од едно во друго одделение за интензивна нега“, рече таа.
По летот, Румејса сподели неколку фотографии од авионот и им се заблагодари на екипажот и на авиокомпанијата за организирањето на патувањето, додавајќи дека тоа било неверојатно искуство.
"Ова беше мојот прв лет, но сигурно нема да биде последен. Отсега па натаму, ќе ми биде чест и ќе бидам среќна да летам во различни делови на светот. Ви благодарам од сѐ срце на секој еден човек кој учествуваше во моето патување“, напишала таа.
Инаку, Румејса прослави соборување на три нови светски рекорди. По неодамнешното мерење, таа стана жената со најголеми раце, како и најдолги прсти и грб.
Нејзината десна рака е долга 24,93 см, додека просечната женска рака е долга околу 17 см.
