Султанот од Брунеи е на тронот на парламентарната монархија од 1967 година, а неговото богатство се проценува на 35 милијарди долари. За богатството на Хасанал Болкијах на големо се зборува и пишува, а не помалку екстравагантен е и неговиот приватен живот.
Во младоста, султанот се оженил со своја роднина, а наскоро се оженил и со друга жена, поранешна стјуардеса. Тој брак не издржал, па таа ја напуштила палатата, а неколку години подоцна султанот се вљубил во новинарката Азриназ Мажар Хаким. Таа е дури 33 години помлада од него, но на султанот не му било грижа. Од друга страна, тој не сакал ни да се разведе од првата жена што ја сакал.
Султанот од Брунеи има вкупно 12 деца, а својот луксузен начин на живот им го пренел на синовите кои во ништо не заостануваат зад својот татко. На пример, принцот Абдул Малика, неговиот третороден син, се ожени во 2015 година, а „Форбс“ ја опиша оваа венчавка како „кралска венчавка за да ги победи сите кралски свадби“. Траела една недела, а на главната церемонија младенците беа облечени во необични комбинезони обложени со скапоцени камења, додека невестата наместо цвеќе држеше букет од накит и благородни метали.
Уште еден од синовите на султанот - принцот Абдул Матина сака да се капе во луксуз и тоа јавно да го покажува. Важи за вистинска сензација на Инстаграм со повеќе од милион луѓе кои го следат, а со задоволство споделува детали од скапите патувања и прикачува фотографии од јахти, приватни авиони или додека игра поло.
Тука не е крајот - и принцот Азим, вториот син на султанот, е познат по тоа што организира екстравагантни забави со познатите гости, вклучувајќи ги Памела Андерсон, Џенет Џексон и Мараја Кери.
Ригорозни закони за населението
Во април 2019 година, султанот на оваа земја се најде во центарот на светското внимание кога го заостри и онака ригорозниот закон од 2013 година заснован на шеријатското право. Така, денес во Брунеи важат брутални казни, вклучувајќи каменување до смрт, ампутација на екстремитети, камшикување и тоа за дејствија кои во повеќето земји дури и не се толкуваат како прекршоци - измама, вонбрачна бременост, носење несоодветна облека, хомосексуалност...
Брунеи има само 400.000 жители
Брунеи има само 400.000 жители, а бидејќи е богат со нафта и гас, повеќето од нив живеат и повеќе од добро. Но, се разбира, богатството на султанот Хасанај тешко некој може да го надмине - со години беше најбогатиот човек на светот, а и денес не е далеку од тоа. Неговата палата е најголемата приватна резиденција во светот со 1.788 соби, 257 бањи и климатизирани штали за 200 коњи. Тој поседува повеќе од 7.000 автомобили, вклучувајќи ги и некои од најлуксузните на сите времиња и е најголемиот колекционер на мерцедес во светот.
Колку пари всушност има, можеби најдобро говори фактот што за својот 50-ти роденден го покани Мајкл Џексон да ги забавува гостите, а за три концерти плати 17 милиони долари.
Сепак, додека владејачкото семејство добро се забавува, ова не важи за остатокот од земјата - алкохолот е забранет во Брунеи, нема дискотеки, ноќни клубови, а забрането е да се слави Божиќ, дури и да се украсуваат прозорците на крајот на годината! На малкуте христијани им е дозволено да го слават во своите четири ѕида, но без јавни обележја.
Спротивно на сите закони што ги донел, самиот султан живеел и живее екстравагантно и раскалашено, а неговите години биле обоени со скандали и ароганција.
Сè остана во сенка на приказната за неговиот брат Џефри
Тој беше министер за финансии во средината на 90-тите, а заедно со неговиот брат уживаше во привилегиите што им ги даваа парите и моќта. Имаа свој харем во палатата, организираа раскалашени забави, а медиумите ги карактеризираа како „постојани соучесници во хедонизмот“. Џефри отишол дотаму што имал јахта што ја нарекол „Ци*ки“, а два помали брода ги нарекол „Брадавица 1“ и „Брадавица 2“.
Оваа идилична братска врска пропадна како кула од карти кога беше откриено дека од кралската каса исчезнале 16 милиони долари, а султанот го обвини Џефри за тоа. Тој ги негираше обвинувањата, но секако му беше одземена функцијата и беше „осуден“ на егзил.
Многу потешко од проневерата на пари, на султанот му падна фактот дека Џефри предизвика скандал од меѓународни размери, трајно нарушувајќи го позитивниот имиџ на Брунеи. Имено, протекоа сведоштвата на неколку девојки за сексуалните навики на принцот Џефри, што неминовно доведе до разоткривање на султановите склоности.
Поранешната мис на Калифорнија и Америка, Шенон Маркетиќ, во 1997 година откри дека била сексуална робинка во дворецот, каде што првично дошла да работи на промоција и маркетинг за плата од 3.000 долари на ден. Се завршило со тоа што таа во реалноста беше на служба на Џефри дење и ноќе, а откри и дека била подложена на понижувачки третман и дека била затворена во палатата на султанот 32 дена.
Шенон се обидела и да ги тужи султанот и принцот на американски суд, но се заврши со тоа што браќата добија имунитет од правно гонење, со оглед на тоа дека се шефови на држави. Во судските документи стои и дека Маркетиќ сведочела дека покрај неа во харемот на султанот имало уште 30-100 жени.
Маркетиќ не беше единствената која отворено зборуваше за нејзината агонија - по неа се појавија цела низа западни убавици кои биле „ангажирани“ кај султанатот, најчесто несвесни каде всушност одат.
Џилијан Лорен ја напиша и книгата „Мојот живот во харемот“, каде што ја откри вистината за нејзиниот престој во Брунеи. Таму пристигнала кога имала само 18 години, а на принцот Џефри му била на располагање со уште 40-тина девојки. Таа откри дека по една година и откако спиела со него повеќе од сто пати, тој едноставно ја „подарил“ на султанот кој инсистирал таа да го задоволува само орално.
„Тој е луд и декадентен. Во тоа време тоа ми беше привлечно, неговата самодоверба, харизма и нескротливост“, раскажала Џилијен во 2011 за принцот Џефри.
На списокот на жени со вакво искуство се најде и зајачицата на Плејбој, Ребека Ферати, која го опиша Џефри како „исламска верзија на Хју Хефнер“ со една разлика - дека нема идеја како да организира добри забави.
Она што е сигурно е дека на султанот Хасанал му се ближи крајот, тој веќе старее, а тронот ќе го преземе еден од неговите исто толку ексцентрични синови. Дали ќе бидат сурови и лицемерни како татко им, останува да видиме...
© Vecer.mk, правата за текстот се на редакцијата
