Ужасен злостор ја потресе Аризона откако мајка (38), по пукање во сопругот и уште една жена во локален бар, заминала дома, ги убила своите две мали деца, а потоа си пресудила и себеси.
Андреа Клерис Дејвис (38) е осомничена дека среде ноќ пукала во својот сопруг Нолан Дејвис (39) и во една 36-годишна жена. Според соопштението на полицијата, Дејвисова по пукањето се вратила дома каде што им ги одзела животите на своите деца – 18-месечниот Андолан и десетгодишниот Остин – пред да изврши самоубиство.
Крвавиот пир започнал пред бар
Оваа насилна низа започнала пред спортски бар во Глендејл, каде што Андреа допатувала со автомобил и отворила оган врз човекот со кого поминала 12 години во брак.
Другата жена, чиј идентитет полицијата не го открива, била погодена во тилот додека се обидувала да побегне. Таа била итно пренесена во болница и нејзините повреди, за среќа, не се опасни по животот. Нолан во пукањето поминал без повреди, но тоа не ја запрело побеснетата жена.
Морничави пораки и фотографии испратени до таткото
Андреа влегла во автомобилот и се одвезла околу три километри подалеку, до нивната семејна куќа во Феникс. Веднаш по пристигнувањето, му испратила СМС-порака на сопругот во која се заканува дека ќе им наштети на децата.
За работата да биде уште полоша, Андреа му испратила и стравична фотографија од едното дете на кое му крвавела главата.
Ужаснатиот татко веднаш ги пријавил заканите кај полицајците кои веќе биле на местото на пукањето кај барот, по што патролите итно побрзале кон семејната куќа. За жал, било предоцна.
Полицајците веднаш провалиле внатре и тогаш се соочиле со стравична глетка – ги затекнале безживотните тела на мајката и на двете дечиња.
Мотивот за крвавиот злостор?
Ејми Бауерс, пријателка на починатата жена, открила за медиумите дека Андреа целосно го изгубила разумот поради сомнеж дека мажот ја изневерува со колешка од работа.
„Оваа ситуација целосно ја исфрли од колосек и ја натера да го изгуби разумот“, изјави Бауерс за AZFamily.
„Никогаш претходно немаа вакви проблеми и мислам дека шокот беше преголем за неа. Едноставно не се чувствуваше добро во последно време. Ги молеше сите за помош, тоа воопшто не беше тајна“, додаде пријателката.
Полицијата сè уште не може официјално да потврди дали неверството навистина било мотивот, ниту во каков точен однос биле сопругот и ранетата жена.
„Знаеме дека тие двајца се познавале и дека меѓу нив постоел некаков вид однос. Меѓутоа, колку биле блиски и за каков точно однос станувало збор, засега е предмет на истрага“, изјави полициски функционер.
Полицијата започна детална истрага за пукањето во барот и за овој стравичен семеен злостор.
© Vecer.mk, правата за текстот се на редакцијата
