Скопје се подготвува за историски музички настан. На 1 септември, на градскиот плоштад, по повод јубилејот 35 години од независноста на државата, ќе се одржи мегаконцерт на кој ќе настапи еден од најголемите оперски тенори на сите времиња – шпанскиот маестро Хозе Карерас.
Светската класика на сцената ќе се спои со кремот на домашната естрада. Како дел од проектот „Македонија ол-стар“, рамо до рамо со Карерас ќе застанат Каролина Гочева, Влатко Стефановски, Калиопи, Наум Петрески, Сузана Спасовска, како и Игор и Ана Дурловски.
Овој ексклузивен концерт е втор голем настан во рамките на државната прослава, веднаш по веќе најавеното гостување на диџејот Давид Гета и неговото „Монолит шоу“ на Градскиот стадион на 8 септември.
Спој на светската класика со македонскиот мелос
Првиот човек на „Авалон продукција“, Бобан Милошески, на официјалната прес-конференција истакна дека идејата била да се создаде незаборавна вечер во која ќе се испреплете светското со нашето, македонското.
Милошески откри дека замислата била уште поголема, но поради претходно закажани обврски во странство, на овој музички десант нема да можат да им се приклучат Владо Јаневски и пијанистот Симон Трпчески. Тој додаде дека составот на домашните изведувачи е негов личен избор за кој целосно ја презема одговорноста, притоа ветувајќи и многу изненадувања кои социјално ќе се чуваат во тајност до самата вечер.
Филхармонија во полн состав и песни во ново руво
Целиот спектакуларен настан ќе биде поддржан од оркестарот на Македонската филхармонија. Директорот Мустафа Имери изрази огромна благодарост и гордост што токму неговиот тим ќе има чест да ја отвори големата прослава за независноста.
За сите домашни песни да звучат светски и моќно, аранжманите ќе ги преработи познатиот композитор Николче Мицевски. Тој најави дека македонските безвременски хитови ќе добијат сосем ново, симфониско руво, кое дополнително ќе ја збогати нивната убавина и ќе им даде грандиозна димензија соодветна за ваков јубилеј.
© Vecer.mk, правата за текстот се на редакцијата
