Отворете ја апликацијата за временска прогноза на вашиот телефон и видете дека пишува 40% веројатност за дожд. Дали ова значи дека ќе врне 40% од времето, на 40% од територијата, или има 40% веројатност воопшто да врне?
Објава на социјалната мрежа Reddit предизвика дебата што потресе сè што го знаеме за апликацијата за временска прогноза.
„Ако метеорологот е 80% сигурен дека ќе падне дожд, но очекува да покрие само 50% од прогнозирана област, тогаш прогнозата би гласела 40% веројатност за дожд за која било дадена локација“, се вели во објавата.
„Ако метеорологот очекува широко распространета област на врнежи со 100% покриеност, но е само 40% сигурен дека ќе стигнат до прогнозирана област, тоа би резултирало и со 40% веројатност за дожд на која било дадена локација во прогнозирана област“, додава корисникот Wonderscout1.
Ако претходно бевте збунети, веројатно сега сте уште повеќе. За среќа, имаше и такви што дадоа дополнителни објаснувања.
„Процентот ја означува веројатноста дека ќе врне дожд на локација во поширока област. Веројатноста за дожд во целата област се множи со процентот на областа што ќе биде погодена од дожд“, пишува едно од објаснувањата.
„Кога ќе видите 40% врнежи, тоа значи дека има 40% шанса дека ќе врне токму таму каде што сте“, напиша друг коментатор.
Кој е во право?
Процентот што стои во апликациите за временска прогноза значи веројатност дека дождот ќе врне на одредено место во одреден временски интервал - обично тоа е еден час. Значи, ако пишува „40% шанса за дожд“, тоа се однесува на локацијата во рок од еден час.
Сè што коментаторите на Reddit го кажуваа е поткрепено со претходни методи што ги користеа метеоролозите. Сепак, денешните апликации користат машинско учење и вештачка интелигенција, па затоа прогнозите обично се однесуваат на местото каде што сте.
Значи, ако видите „40%“ до иконата за дождлив облак во апликацијата Apple Weather, тоа значи дека ќе има 40% шанса за дожд, на вашата локација, во одреден временски интервал (да речеме помеѓу 12:00 и 13:00 часот).
© Vecer.mk, правата за текстот се на редакцијата
