Праисториски гигант кој некогаш доминирал на врвот на синџирот на исхрана сега е достапен за јавноста. Благодарение на долгогодишната работа на научниците од Универзитетот Колумбус и модерната технологија, во музејот „Телус“ во Џорџија е изложен првиот научно прецизен скелет на монструозниот крокодил Deinosuchus schwimmeri, кој достигнува должина од фасцинантни 9,5 метри.
Овој предатор, голем колку автобус, живеел пред повеќе од 75 милиони години во југоисточниот дел на денешните САД и бил толку моќен што неговиот плен честопати биле самите диносауруси, пишува „Sciencedaily“.
Клучната фигура во ова откритие е д-р Дејвид Швимер, водечки експерт кој повеќе од четири децении ги истражувал фосилните наоѓалишта во Алабама, Џорџија и Тексас. Неговата посветеност била толку значајна што палеонтолозите пред шест години официјално го именуваа овој вид во негова чест. Швимер објаснува дека проучувањето на ваквите врвни предатори ни помага да ги дешифрираме најголемите стратегии за преживување во природата и да разбереме како животот се прилагодувал и доминирал во светот кој постојано се менувал.
Репликата е изработена во соработка со компанијата „Triebold Paleontology Inc.“ и во моментов музејот „Телус“ е единственото место во светот каде посетителите можат да го видат овој редок одлевок на „убиецот на диносауруси“. Иако Deinosuchus е близок роднина на денешните алигатори, неговата големина и предаторските навики го прават еден од најстрашните жители на праисториската Земја.
© Vecer.mk, правата за текстот се на редакцијата
