Новообјавените документи од американските архиви кои ги пренесува „Дејли мејл“ откриваат фасцинантни описи на неидентификувани летала и нивните екипажи. Сведоците ги опишуваат овие суштества како екстремно ниски, со висина од околу 110 сантиметри, облечени во одела кои потсетуваат на скафандери со кациги. Извештаите содржат детали за метални објекти кои се движат нечујно и предизвикуваат дефекти на електрониката, а во некои случаи се споменуваат дури и пронајдени остатоци од непознати метали и мистични микроскопски сфери по наводни падови.
Сепак, анализата на овие документи укажува на тоа дека тие претставуваат повеќе историска архива на народни верувања и несертифицирани дојави отколку научен доказ за вонземски живот. Самите извештаи честопати се само збирка на прераскажани приказни кои ФБИ ги собирал и складирал со децении. Многумина забележуваат дека овие описи речиси целосно се совпаѓаат со визуелниот стил на старите американски научнофантастични филмови од Б-продукција, што кај голем дел од јавноста предизвикува повеќе иронија отколку страв.
Иако темата е дополнително актуелизирана со изјавите на политичките фигури како Доналд Трамп и претходните објави на Министерството за војна, суштината останува непроменета. Документите потврдуваат дека американските служби биле педантни во собирањето информации за време на Студената војна, но не нудат ниту еден конкретен доказ дека „малите вонземјани“ навистина некогаш слетале на Земјата. Целата приказна засега останува во рамките на интересни архивирани анегдоти од минатиот век.
© Vecer.mk, правата за текстот се на редакцијата
