Наместо да чекате со недели за резултати за вашата здравствена состојба, сега можете да добиете детална анализа во рок од три минути.
Звучи сосема неверојатно, но само едно одење во тоалет ве дели од сознанието дали сте доволно хидрирани и дали вашите бубрези се функционални.
Ова се однесува на добро познатите „паметни“ тоалети.
Оваа технологија веќе е имплементирана во некои јавни и приватни установи во Кина, а за симболична цена, корисниците можат да добијат брза и едноставна анализа на своето тело – без да одат на лекар.
Сепак, иако идејата изгледа револуционерна, многумина се скептични.
Експертите ја доведуваат во прашање точноста на ваквите уреди, како и безбедноста на податоците. Паметните тоалети би можеле да ги откријат вашите медицински податоци, предупредуваат експертите за безбедност.
Тоалетите што собираат здравствени податоци би можеле да бидат хакирани и да откријат исклучително чувствителни информации, поради што треба да се регулираат како медицински помагала, велат експертите за безбедност.
Без оглед на сомнежите, едно е сигурно – оваа иновација претставува огромен технолошки чекор, кој би можел да го промени начинот на кој го следиме нашето здравје.
Замислете дека тоалетот ве предупредува: „Внесувате премалку вода“ или ви „сугерира“ да го намалите стресот.
Со напредокот на технологијата, границата помеѓу секојдневниот живот и дигиталниот надзор станува сè потенка. Паметните тоалети може да изгледаат како футуристички луксуз, но тие се и потсетник за тоа колку брзо светот го менува начинот на кој го следиме и заштитуваме нашето здравје.
Останува да се види дали оваа практика ќе се прошири во други земји и дали ќе стане дел од нашето секојдневие – или ќе остане само уште еден технолошки експеримент.
© Vecer.mk, правата за текстот се на редакцијата
