Прастариот архипелаг во близина на брегот на Калифорнија би можел од корен да ги промени досегашните научни сознанија за тоа како првите луѓе пристигнале во Америка. На калифорниските Каналски Острови, археолозите пронајдоа човечки остатоци стари околу 13.000 години, траги од древни населби и низа други докази кои упатуваат на тоа дека најраните жители на овој континент пристигнале по морски пат, а не преку копнениот коридор низ мразот, како што се веруваше со децении, пишува „Дејли Мејл“ (Daily Mail).
„Автопат на алгите“ наместо пешачење низ мраз
Според оваа нова хипотеза, луѓето за време на Леденото доба пловеле долж пацифичкиот брег користејќи го таканаречениот „автопат на алгите“, синџир од крајбрежни екосистеми исклучително богати со храна, што им овозможувало постепено да населуваат нови подрачја.
Ваквиот сценарио целосно ја урива општоприфатената теорија според која првите доселеници од Сибир го преминале тогашниот копнен мост (Беринговиот Проток), па преку леден коридор пеш се спуштиле на југ.
Човекот од Арлингтон Спрингс и џуџестите мамути
Каналските Острови веќе повеќе од еден век го привлекуваат вниманието на научниците. Меѓу најважните наоди се издвојуваат остатоците на таканаречениот „Човек од Арлингтон Спрингс“, откриени во 1959 година на островот Санта Роса. Пософистицираните лабораториски датирања покажаа дека овие коски се стари најмалку 13.000 години, што ги прави едни од најстарите човечки остатоци во Северна Америка.
Она што е фасцинантно е дека овие траги се најдени на остров оддалечен од копното. Тоа значи дека тогашните луѓе морале да поседуваат пловни објекти и напредни поморски вештини многу порано отколку што се претпоставуваше досега.
Покрај тоа, на островите се пронајдени и кости од џуџести мамути, уникатна вид кој еволуирал токму таму по леденото доба. Бидејќи овие мамути исчезнале во речиси исто време кога се појавиле и првите луѓе, научниците не ја исклучуваат можноста дека најраните жители на Америка всушност ги ловеле.
Клучот на мистеријата се крие под водата
Сепак, меѓу експертите сè уште нема целосен консензус. Повеќето прифаќаат дека луѓето пристигнале во Америка пред културата Кловис (Clovis), која долго време се сметаше за прва на континентот, но дебатата за тоа дали дошле по море, по копно или со комбинација од двата патишта, сè уште трае.
Научниците веруваат дека најголемите откритија дури сега следуваат. Имено, за време на леденото доба, нивото на морето било значително пониско од денешното, па огромни области кои сега се под вода, некогаш биле копно на кое живееле луѓе. Токму подводните археолошки истражувања би можеле да го понудат клучниот одговор на едно од најголемите прашања во човечката праисторија.
© Vecer.mk, правата за текстот се на редакцијата
