Гибралтарскиот Теснец, кој со векови е клучна точка за пловидба и поморски конфликти, стана центар на еден од најголемите подводни археолошки потфати во поновата историја. Шпанските археолози од Универзитетот во Кадиз, во периодот меѓу 2020 и 2023 година, идентификуваа дури 151 подводно археолошко наоѓалиште во Гибралтарскиот Залив, меѓу кои и 124 потонати бродови. Овие откритија, пренесени од CNN, ја потврдуваат историската важност на овој регион како глобален поморски центар.
Водачот на истражувањето, професорот Фелипе Серезо Андрео, истакнува дека иако поголемиот дел од остатоците припаѓаат на поновата историја, пронајдени се и фасцинантни артефакти од античко време. Најстариот брод датира од 5 век п.н.е. и се претпоставува дека пренесувал познат рибен сос произведен во Кадиз низ Средоземното Море. Од друга страна, пронајдени се и остатоци од Втората светска војна, вклучувајќи ги италијанските подморници од типот „Maiale“, кои биле користени за специјални подводни напади.
Интересен е фактот што пред 2019 година на ова подрачје беа официјално евидентирани само четири наоѓалишта. Експертите сметаат дека климатските промени играат клучна улога во овие нови откритија — промените во морските струи и движењето на седиментите на дното предизвикуваат природно „откопување“ на остатоците кои со векови биле скриени под песокот.
© Vecer.mk, правата за текстот се на редакцијата
