Ашвагандата стана вистински хит меѓу додатоците во исхраната – некои ја фалат како чудо против стресот, други ја критикуваат и предупредуваат за можни несакани ефекти. Привлекла толку многу внимание што Данска дури и ја забрани нејзината употреба во додатоци во исхраната во 2023 година.
Зошто Данска ѝ кажа „не“ на ашвагандата?
Техничкиот универзитет во Данска објави извештај во кој ги наведува потенцијалните ризици – од влијанието врз тироидните хормони и половите хормони, до можното влијание врз плодноста. Исто така, се споменуваат абортус-факторски својства, иако за ова нема доволно клинички докази. Накратко, данските власти одлучија да играат на сигурно и целосно да ја исклучат од употреба.
Ашвагандата во ајурведската медицина
Од друга страна, ова растение има долга историја на употреба. Во ајурведската традиција, се користи со векови: за подобар сон, посилен имунитет, повеќе енергија, па дури и како природна поддршка за либидото. Поради овие својства, често се нарекува „индиски женшен“.
Потенцијални придобивки
Студиите се ограничени, но истражувањата и корисничките искуства често известуваат за:
• намалување на стресот и анксиозноста,
• подобар квалитет на спиење,
• зголемување на концентрацијата,
• подобрување на атлетските перформанси,
• зголемување на нивото на тестостерон кај мажите.
Но, постојат ризици
Ашвагандата не е за секого. Не се препорачува за бремени жени, доилки, лица со заболувања на тироидната жлезда или црниот дроб или лица кои земаат одредени лекови. Можните несакани ефекти вклучуваат гадење, дијареја, поспаност или непријатност во стомакот.
Каде е вистината?
Факт е дека нема дефинитивен одговор – некои научни истражувања ги поддржуваат придобивките, додека други предупредуваат за ризиците. Едно е сигурно: ако размислувате за ашваганда, најдобро е прво да се консултирате со вашиот лекар.
© Vecer.mk, правата за текстот се на редакцијата
