Популарна е во светот на исхраната, со тврдења дека може да ги ублажи болките во зглобовите, да го подобри здравјето на цревата, да ја зголеми еластичноста на кожата и друго.
Супата од коска е основна состојка во многу диети, но дали е навистина толку лековита?
Супата од коска беспрекорно ги спојува древните традиции со модерните вредности и е високо ценета поради своите хранливи и лековити својства. Сепак, многу од современите придобивки што му се припишуваат на ова јадењето се теоретски и не секогаш поткрепени со научни докази, а повеќето студии за неговите здравствени придобивки се фокусираат на поединечни состојки во супата.
Сепак, некои тврдења се поткрепени од науката. Во последниве години, истражувањата покажаа дека супата од коска има антиинфламаторни својства што можат да ги намалат симптомите на улцерозен колитис. Хијалуронанот и хондроитин сулфатот во коскената супа од пилешко и зеленчук ја забавуваат прогресијата на остеопорозата, според студија објавена во Journal of Food Science.
Како да се направи
Супата од коска е посебна форма на храна подготвена со варење коски од говедско, јагнешко, пилешко, мисиркино или свинско месо во вода од 12 до 24 часа. Голем дел од течноста е богата со колаген и протеини, како и со елементи во траги. Овие хранливи материи се од витално значење за здравјето – колагенот обезбедува структура, поддршка и цврстина на кожата, мускулите, коските и сврзното ткиво, додека протеините се неопходни за градење и поправка на мускулите, кожата и другите ткива, како и за поддршка на имунитетот, регулирање на крвниот притисок, здравјето на коските, чувство на ситост и контрола на тежината.
„Колку подолго ги готвите коските и ги чувате во супата, толку повеќе протеини и колаген добивате од коските“, нагласуваат нутриционистите, додавајќи дека постојат и микронутриенти, како што се аминокиселини, калиум, калциум, магнезиум, фосфор, железо, селен, витамини А и Б. Исто така, има ниска калорична вредност – обично од 50 до 80 калории по порција, од кои повеќето се протеини.
Кои се потенцијалните здравствени придобивки
Постои причина да се верува дека консумирањето супа од коски може да помогне во здравјето на цревата и микробиомот на цревата со заштита на цревната бариера, велат експертите.
„Oбвивката на цревата помага во варењето, а со текот на времето може да ослабне и да доведе до синдром на протекување на цревата. Покрај тоа, редовното консумирање на коскена супа може да го смири желудникот и да биде корисно за воспаление“, нагласуваат тие.
Некои минерали во супата, како што се магнезиумот, железото и селенот, му помагаат на имунолошкиот систем, заедно со аминокиселините, па ако е зима и сакаме да го поддржиме нашиот имунитет, ова би било корисно, нутриционистите се јасни. Покрај тоа, консумирањето на супата може да помогне при мускулни грчеви поради електролитите што ги содржи, како и функциите на нервниот систем и мускулите.
Она што многумина ги интересира е колку колаген од супата всушност му помага на телото да го обнови сопствениот колаген.
„Оваа супа е богата со колаген, но научните докази дека консумирањето колаген го стимулира производството на колаген во телото се сè уште ограничени“, истакнуваат експертите, а пишува National Geographic.
© Vecer.mk, правата за текстот се на редакцијата
