Во Австрија денеска стапија на сила новите мерки за санација на буџетот кои донесоа бројни поскапувања. Со тоа значително се зголемија цените на цигарите и тутунските производи.
Врз основа на одлуката на Владата, покачен данокот на тутунот, што на пушачите им носи поскапување од 20 до 50 центи за кутија цигари.
Врз основа на зголемувањето на данокот за тутунот, Владата очекува дополнителни приходи во висина од 50 милиони евра. Зголемени се и судските такси за 23 отсто.
Паушалните такси во граѓанските постапки, таксите за развод се особено погодени.
Дополнително, зголемен е и данокот на игрите на среќа од два на пет отсто, што на државата треба да и обезбеди дополнителни приходи во висина од 50 милиони евра годишно.
Некои мерки, со кои Владата има намера да ја санира дупката во буџетот, целосно ја менуваат досегашната политика во областа на заштитата на животната средина, која даваше бројни привилегии за „зелената“ технологија.
Во оваа насока, Владата очекува поголеми приходи во буџетот од укинувањето на поволностите за електричните автомобили во врска со данокот на осигурување.
Само годинава, по укинувањето на тие привилегии, Владата очекува приходи во висина од 65 милиони евра.
Исто така, укинато е и ослободувањето од ДДВ на опремата за соларна енергија за домаќинствата. Со наплата на ДДВ по стапка од 20 отсто, државата очекува приходи до 175 милиони евра.
© Vecer.mk, правата за текстот се на редакцијата
