Владата на Република Српска денеска усвои информација за прекин на соработката со американски и британски дипломати во Босна и Херцеговина поради нивните антидејтонски активности.
Владата соопшти дека Република Српска е принудена да ја прекине соработката со дипломатите на двете амбасади и бара институциите на Република Српска, претставниците на Република Српска во заедничките државни институции, органите на локалната самоуправа во Република Српска, како и другите јавни власти да не да соработува со амбасадите на САД и на Британија, пренесува РТЦГ.
Владата е убедена дека ваквата постапка на амбасадите на САД и Велика Британија не е во согласност со официјалната политика на САД и Велика Британија кон Босна и Херцеговина и зазеде став дека прекинот на соработката трае додека не престанат двете амбасади со практиката на мешање во внатрешните работи на Босна и Херцеговина.
Во соопштението по седницата се наведува дека Владата смета дека е обврска на амбасадите на САД и Велика Британија да не се мешаат во внатрешните работи на други земји, што важи и за Босна и Херцеговина, каде што се само дипломатски претставници.
Се додава дека Владата на Република Српска ќе ги извести надлежните институции на САД и Велика Британија за прекин на соработката со нивните амбасади поради нивните антидејтонски активности и кршење на меѓународното право, Повелбата на Обединетите нации и Виенската Конвенција за дипломатски односи.
Владата ќе ја достави информацијата за прекин на соработката со американските и британските дипломати во БиХ и заклучокот до Собранието на Република Српска, се вели во соопштението.