Екипата на порталот Klix.ba сними фотографии на кои јасно се гледа степенот на оваа катастрофа.
Фотографиите покажуваат големо количество ѓубре и други материјали што ги нанаеле поројните води, што укажува на сериозноста на штетите и опасностите што им се закануваат на жителите.
Спасувачките екипи со поддршка на локалното население неуморно ги раскопуваат урнатините во потрага по преживеани. Блокиран е патот од Јабланица кон околните градови, што уште повеќе го отежнува пристапот и работата на спасувачите.
Досега е потврдена смртта на 17 лица во поплавените подрачја, додека голем број се уште се водат како исчезнати на подрачјето на Јабланица и Коњица. Меѓу загинатите има и едно бебе, додека лекарите во Мостар се борат за животот на мајката.
Властите на Херцеговско-Неретванскиот кантон побарале помош од повисоките нивоа на власта, вклучително и вооружените сили на Босна и Херцеговина, со цел да се обезбеди потребната поддршка во оваа вонредна ситуација. Спасувачките служби се соочуваат со огромни предизвици и многу е потребна поголема помош.
Поради обилните врнежи, поплави ги зафатија и другите делови од БиХ, меѓу кои Кисељак, Фојница и Крешево, каде исто така се забележани големи штети. Состојбата во Коњиц, Крешево и Кисељак останува драматична бидејќи многу куќи се под вода, а граѓаните се принудени да ги напуштат домовите во потрага по побезбедно место.
© Vecer.mk, правата за текстот се на редакцијата
