Минатогодишниот попис на населението во Црна Гора покажа дека секој четиринаесетти граѓанин не живее во оваа земја или секој тринаесетти, ако се исклучат странците вклучени во пописот, јавија црногорски медиуми.
Според конечните податоци од пописот на населението во Црна Гора, од 623.633 лица со вообичаено место на живеење, 44.017 живеат или работат во странство.
Дирекцијата за статистика на Црна Гора (Монстат) претходно објави дека најголем број од нив студираат, живеат или работат во Германија, а порталот Банкар објави анализа колку жители на црногорските општини живеат во странство во однос на вкупниот број, а кои се државите најатрактивни за работа и кои за образование и кои се најчестите причини зошто го напуштиле родното место.
Според таа анализа, општина Петњица има повеќе жители во странство отколку во таа општина. Од 5.552 жители на Петњица, колку што е изброено минатата година, 3.271 од нив живеат, работат или студираат надвор од својата општина. Тоа практично значи дека во таа општина живеат само 2.281 жители.Најголем број од нив има во Луксембург, речиси секој втор жител на оваа општина, односно 1.580 од нив. Околу 600 се во Германија, додека Швајцарија, Франција и Словенија се меѓу најчестите дестинации што ги избираат жителите на таа општина.
Втор град со најголем број жители кои живеат во странство е Гусиње. Од 4.662 граѓани, 1.032 живеат во странство, односно речиси секој четврти, а најголем дел се во САД.
Од вкупно 44.017 жители на Црна Гора кои живеат, работат или студираат во странство, повеќе од десет илјади се во Германија, односно секој четврти. Повеќето од нив се жители на Бијело Поље и Рожаје.
© Vecer.mk, правата за текстот се на редакцијата
