Поранешниот премиер на Бугарија и актуелен лидер на ГЕРБ денеска посака успех во финализирањето на францускиот предлог за решавање на спорните прашања меѓу Бугарија и Република Северна Македонија, јави БГНЕС.
Тој соопшти дека Извршната комисија на ГЕРБ го разгледала предлогот за РСМ и повика на финализирање на договорот.
– На тема РСМ, навистина им посакувам успех на колегите во Софија да го финализираат договорот, за да можеме да кажеме дека француското претседателство направи многу и дека биде успешно, како што заслужува, рече Борисов.
Во меѓувреме, се огласи и француската амбасадорка во Софија Флоренс Робин, која исто така, побара брзо усвојување на договорот во Бугарија. Според амбасадорката Флоранс Робинс, последниот предлог е ист со документот кој претходно го усвои бугарскиот Парламент.
– Тој (предлогот) не се разликува од првиот и целосно ги штити правата на малцинствата во заедницата, вклучително и Бугарите. Документот е идентичен со првиот, веќе изгласан во бугарскиот парламент и не треба ново разгледување во земјата, изјави таа за Еуроњуз и нагласи дека „Париз не вршел притисок врз Бугарија во спорот“.
– Документот е поставен во духот на претходниот договор, кој бугарскиот парламент веќе го изгласа и нема потреба повторно да се разгледува. Ова е компромисен предлог. Не го ревидира, туку го рафинира претходниот документ. Воспоставивме рамка за добрососедство во односите меѓу двете земји и тоа ја потврдува посветеноста на Северна Македонија во заштитата на правата на малцинствата во заедницата, рече Робин.
Бугарското Народно собрание на 24 јуни гласаше за предлог-решение кое има за цел да го реши спорот меѓу Софија и Скопје и да го отвори патот за европска интеграција на РСМ. Нацрт-одлуката се надоврзува на предлогот на француското претседателство и се надградува за да бидат максимално заштитени бугарските интереси, потенцира БГНЕС и потсетува дека вчера и бугарската Влада ја одобри оваа одлука на бугарскиот Парламент.
Францускиот предлог се состои од три независни елементи, кои само заедно можат да одговорат на прашањето дали РСМ е подготвена да ги започне преговорите за членство во ЕУ.
Првиот документ, нацрт-заклучоците на Советот, ни кажува дека темата „билатерални односи Скопје-Софија“ ќе биде дел од преговарачкиот процес. Овој документ, како и вториот документ, преговарачката рамка, се однесуваат на трет, клучен документ – билатерален протокол, во кој нема ништо француско и е целосно производ на договор меѓу министерствата за надворешни работи на двете земји. Ова е всушност патоказот со конкретни ангажмани и етапи кои Скопје мора да ги исполни во замена за Бугарија да го укине ветото, посчува бугарската агенција БГНЕС.
