На годишното собрание на Европската слободна алијанса едногласно е усвоена декларација со која од Бугарија се бара формално извинување за злосторствата врз македонското малцинство за време на комунистичкото владеење, како и спроведување на 14-те случаи пред Европскиот суд за човекови права поврзани со регистрацијата на македонски организации во Бугарија, наведено е во извештајот на ЕФА.
Во декларацијата се оценува дека македонското малцинство во Бугарија се соочува со една од најсериозните кризи на човековите права во рамките на Европската Унија.
Според Европската слободна алијанса, системската репресија и етничкото негирање со кои се соочуваат Македонците во Бугарија се директно продолжение на политиките на денационализација започнати во времето на комунистичкиот режим на Тодор Живков.
Во документот се наведува дека уште во 1963 година политиката на негирање на постоењето на македонско малцинство била централен дел од процесите на присилна асимилација на малцинствата во рамките на концептот за „единствена бугарска социјалистичка нација“.
Од ЕФА посочуваат дека македонските заедници и денес се соочуваат со исклучувачка реторика од современи бугарски политичари, слична на онаа од времето на Живков, според која „Македонците не смеат и не можат да постојат“.
Европската слободна алијанса предупредува дека Бугарија во изминатиот период се обидела да ја избегне меѓународната одговорност, барајќи од Комитетот на министри предвремено да го затвори мониторингот врз група предмети поврзани со повреда на правото на здружување. Станува збор за случаи кои се однесуваат на членот 11, односно правото на слобода на здружување.
И покрај пресудите и меѓународните обврски, македонските организации во Бугарија и натаму не можат да добијат законска регистрација. Со тоа, се наведува во декларацијата, тие се спречени официјално да ги застапуваат своите основни права, интереси и потреби.
ЕФА повикува за:
Висока свест: Неопходни се концентрирани напори за истакнување на сериозната ситуација со човековите права на македонското малцинство во Бугарија, конкретно адресирајќи го одбивањето на државата да спроведе над 14 решение на Судот за човекови права кои се однесуваат на регистрацијата на македонските организации, како и говорот на омраза кој тие го поднесуваат.
Правна одговорност: Европската Унија мора строго да ја повика Бугарија на одговорност за нејзините правни обврски како земја-членка на ЕУ, особено во врска со обврските за човековите и малцинските права кои Бугарија постојано не успева да ги исполни.
Ставање крај на двојните стандарди: Прекин на примената на двојни стандарди од ЕУ кон земјите-членки и земјите-кандидати во врска со заштитата и третманот на националните малцинства и унапредувањето на нивните права.
Политичка застапеност: Подигнување на сериозното прашање за вклучување на македонски претставник во Националниот совет за соработка по етничките и интеграциските прашања во Бугарија, со цел заедницата конечно да биде вклучена и претставена.
Официјално извинување за историските злосторства: Барање Бугарија официјално да се извини за злосторствата што ги извршила врз своето македонско малцинство за време на комунизмот. Ова мора да ги признае илјадниците Македонци кои беа претепани, присилно раселени, понижувани, казнувани, затворани и убивани поради изразувањето на својот етнички идентитет и противењето на бугарските политики на денационализација.
© Vecer.mk, правата за текстот се на редакцијата
