Европската Унија ја враќа темата за проширувањето на врвот на својата агенда, но со јасен услов: членството не е политички подарок, туку резултат на видливи закони и функционални институции. Ова е главниот заклучок од изјавата на еврокомесарката за проширување, Марта Кос, дадена пред состанокот на Советот на ЕУ во Брисел. Кос порача дека вратата е отворена за сите земји од Западен Балкан, но патот до таму води исклучиво преку владеење на правото.
Комесарката ја издвои Црна Гора како најуспешен пример во регионот, откривајќи дека по пауза од 17 години, Брисел формирал работна група за пристапување на нова членка. Очекувањата се дека Подгорица ќе го заврши техничкиот дел од преговорите до почетокот на следната година.
Сликата е поинаква за Србија. Иако формално средствата не се замрзнати, Кос потврди дека Белград нема добиено „ниту едно евро“ по спорните правосудни измени. Пораката до Белград беше децидна: „Има место за Србија во ЕУ, но за демократска Србија која напредува, а не назадува“.
Како практичен чекор на патот кон единствениот пазар, Кос ги најави претстојните исплати од Планот за раст, при што околу 100 милиони евра се наменети за Албанија и Црна Гора.
Паралелно со финансиската поддршка, процесот на постепена интеграција веќе овозможува конкретни придобивки за граѓаните. Приклучувањето на Македонија, Албанија, Црна Гора и сега Србија кон СЕПА системот (SEPA) значи побрзи и драстично поевтини трансакции во евра, што е еден од првите знаци за економско приклучување кон Европа.
Следната голема станица за регионот е Самитот ЕУ – Западен Балкан, кој ќе се одржи на 5 јуни во Подгорица. Од овој собир се очекува силна потврда на европската иднина на Балканот, но и потсетување дека членството бара политичка посветеност која може да се провери преку реални резултати на терен.
© Vecer.mk, правата за текстот се на редакцијата
