Премиерот Димитар Ковачевски порача дека техничката влада е дефинирана согласно закон и точно се знае кој предлага министри, а ВМРО-ДПМНЕ има законска обврска да предложи министри и заменици во предвидените министерства, во спротивно, тоа ќе стави дамка на целиот изборен процес.
Согласно законот, Ковачевски појаснува дека точно се знае кои министерства ќе ги предводи парламентарното мнозинство, а кои најголемата опозициска партија.
– Од ВМРО-ДПМНЕ треба да предложат министри во Министерството за внатрешни работи и Министерството за труд и социјална политика, а власта да предложи дополнително заменици министри во овие министерства. Тие треба да предложат дополнителен заменик-министер во Министерството за финансии, во Министерството за земјоделство и во Министерството за информатичко општество и администрација. Ова се работи коишто се дефинирани согласно со закон, додаде Ковачевски.
Тој додаде дека ќе ја исполни неговата законска обврска и ќе поднесе оставка на 100 дена пред одржување на изборите и оти не пости причина ВМРО-ДПМНЕ да не ја исполни својата законска обврска, бидејќи тоа предлагање произлегува од Закон за Влада и од Закон за избори
– Тоа е законска обврска, како што е законска обврска на 100 дена пред одржување на изборите претседателот на Владата да поднесе оставка. Јас ќе ја исполнам мојата законска обврска исто како што и другите претседатели на влада пред тоа ја исполниле својата законска обврска, и како што другите политички партии пред тоа ја исполниле својата законска обврска. Сметам дека не постои причина во овој случај ВМРО-ДПМНЕ да не ја исполни својата законска обврска, бидејќи тоа предлагање произлегува од Закон за Влада и од Закон за избори, изјави Ковачевски.
Доколку опозициската ВМРО – ДПМНЕ не учествува во техничката влада, според него, тоа става само една дамка на целиот изборен процес.
– Ние од 2016 година наваму имаме изборни процеси коишто се од сите оценети како исклучително демократски и од ОБСЕ/ОДИХР и од меѓународните партнери, од меѓународните организации, така што сметам дека не постои никаква пречка или причина тоа да не биде направено и Северна Македонија на 24 април и на 8 мај да има демократски избори на коишто граѓаните ќе ја изразат својата демократска волја, додаде претседателот на Владата.
Секое импровизирање кога се реализираат законски одредби, тој нагласи дека може да фрла дамка врз целиот процес.
Од ВМРО-ДПМНЕ велат дека за учеството во техничката влада ќе одлучат во текот на наредната недела и порачуваат дека власта има желба за изборен поткуп, со социјална помош за граѓаните и со буџет скроен за изборни подмитувања, ама тие ќе носат спротивни одлуки на тоа
Ставот на СДСМ, пак, во врска со евентуалното неучество на ВМРО-ДПМНЕ е дека со тоа партијата си прави алиби за поразот на престојните претседателски и парламентарни избори.
Парламетарните избори се договорени да се одржат на 8 мај, а се очекува да се распишат 70 дена претходно, на 28 февруари. Техничката влада согласно законите треба да се формира на 100 дена пред парламентарните избори, што значи околу 30 јануари, а дотогаш има уште 50 дена. Според договореното, технички премиер ќе биде актуелниот претседател на Собранието Талат Џафери, а местото спикер ќе го заземе координаторот на пратеничката група на СДСМ Јован Митрески. Во јавноста деновиве се шпекулираше дали ќе има нов прв вицепремиер на местото на Артан Груби заради тоа што ДУИ го доби премиерското место, а Ковачевски на тоа прашање одговори дека законски е предодредено во кои министерства ќе има промени. Истиот одговор го даде и на прашањето има ли можност во техничката влада да има министри од албанската опозиција.
Во врска со можноста ВМРО-ДПМНЕ да не предложи министри и заменици за техничката влада, Ковачевски повтори дека тоа е нивна законска обврска исто како што е законска обврска претседателот на Владата да поднесе оставка 100 дена пред изборите.
– Јас ќе ја исполнам мојата законска обврска исто како што и другите претседатели на влада и политички партии пред тоа ја исполниле. Неучеството на ВМРо-ДПМНЕ, како и секое импровизирање при реализазија на законските одредби ќе стави дамка на целиот изборен процес. Ние од 2016 година наваму имаме изборни процеси коишто од ОБСЕ/ОДИХР и од меѓународните партнери и организации се оценети како исклучително демократски, така што сметам дека не постои никаква пречка или причина тоа да не биде направено и Северна Македонија на 24 април и на 8 мај да има демократски избори – рече Ковачевски.
Премиерот Ковачевски вчера порача дека има координација со коалициските партнери и дека бил консултиран од лидерот на ДУИ Али Ахмети во врска со номинацијата на Џафери за технички премиер.
– Имавме успешна лидерска средба на која што можевте да видите дека со најширок можен консензус беше договорено дека ќе имаме избори на 24 април и на 8 мај, дека координаторите на пратеничките групи ќе го поднесат Изборниот законик во Собранието во којшто се имплементирани забелешките на ОБСЕ/ОДИХР. На средбата воопшто не стана збор за укинување на техничката влада со оглед на тоа дека се работи за многу краток период пред изборите и доколку за такво нешто се разговара ќе треба да се разговара за некои наредни избори – истакна Ковачевски.
Координаторот Јован Митрески, кој вчеравечер од ИК на партијата беше избран да го води Собранието наместо Џафери, рече дека честа е голема, а одговорноста што доаѓа со таква, исклучително важна државничка позиција е уште поголема.
– Благодарен сум на укажаната доверба од страна на раководството на СДСМ. Како и досега, максимално посветено и одговорно ќе работам за интересот на граѓаните, државата, угледот и дигнитетот на македонското Собрание – порача Митрески.
Партискиот генерален секретар Миле Зечевиќ е предложен за шеф на изборниот штаб за кампањата за парламентарните избори 2024 година, а претседателот на СДСМ Димитар Ковачевски добил овластување за подготвителни разговори и консултации со парламентарните партии за техничка Влада.
© Vecer.mk, правата за текстот се на редакцијата
