Адвокатот Тони Базби, кој планира да поднесе тужба против уапсениот Шон Диди Комбс во име на 120 жртви на сексуален напад, тврди дека телефонската линија што ја поставил претходно оваа недела била преплавена со неверојатни 12.000 повици за околу 24 часа.
„Од вчерашната прес-конференција, имавме 12.000 повици за околу 24 часа“, рече Базби.
Имено, на овој начин адвокатот им овозможил на жртвите кои се уште не ја кажале својата страна од приказната и кои не се осмелиле да го пријават злоставувањето извршено од познатиот рапер, да контактираат со него.
„Нашата задача е да се обидеме да го провериме секој од овие повици и да ги идентификуваме жртвите и оние што се сведоци и да собереме докази“, рече адвокатот, додавајќи дека речиси 100 луѓе работат на случајот на Диди, пренесува New York Post.
„120-те тужби за кои зборувавме пред неколку дена, тоа се тужбите што би можеле веднаш да ги поднесеме против Шон Комбс, но сакаме да се погрижиме да собереме сè што можеме“, додаде Базби.
Наводите од луѓето кои контактирале со адвокатот вклучуваат насилен сексуален напад, силување, сексуален напад, олеснување секс со употреба на контролирана супстанција, лажно затворање, присилна проституција, дистрибуција на видеа без согласност на луѓето во нив и сексуална злоупотреба на малолетници. Едно лице имало 9 години кога се случило наводната злоупотреба.
Во изјава за Си-Ен-Ен, адвокатката на Комбс, Ерика Волф, нагласи дека нејзиниот клиент категорично ги негира сите наводи. „Господин Комбс силно и категорично ги негира како лажни и клеветнички секое тврдење дека сексуално злоставувал некого, вклучително и малолетници“, рече Волф, додавајќи дека Комбс со нетрпение очекува да ја докаже својата невиност на суд.
© Vecer.mk, правата за текстот се на редакцијата
