„Среќа и несреќа“ е насловот на новата песна на Бојана Скендеровски, која за неа ја стокми познатиот композитор од соседството Саша Милошевиќ-Маре. Премиерното преслушување се случи на синоќешната промоција одржана во продукцијата „Скендеровски“, а освен што песната е снимена на македонски има и своја српско-хрватска верзија, што всушност е и најава за пробив на регионалниот пазар на Бојана.
-Бојана е одлична. Имате, што би се рекло добар извозен материјал, рече на промоцијата композиторот Маре, кој патем беше и автор на победничката евровизиска песна „Молитва“ на Марија Шерифовиќ и дел од жирито во шоуто „Никогаш не е доцна“.
Бојана во истовреме на јавноста и го претстави и видеото за темата, а сопругот Васко освен со огромен букет ја изненади и со видео кое всушност беше своевидно патување низ 20-годишната кариера на пејачката.
- Маре е мојот омилен композитор и среќна сум што ја имам честа да соработувам со него. Нѐ запозна Кеба, тој е наш семеен пријател, рече Бојана, која патем откри и дека е пресреќна со финалниот производ, но и со фактот дека конечно ја има песната која долго ја чекала.
Слушнете ја новата песна:
© Vecer.mk, правата за текстот се на редакцијата
