Фолк пејачот Јордан Мотев го промовира спотот за песната “Да се живи здрави младоженеците”, песна која ја сними и промовораше во 2019 година.

– Планот да снимам и промовирам видеозапис за оваа песна беше пролонгиран поради турнеи, гостувања, потоа почна пандемија. Поради овие, но и други причини морав да паузирам со работата. Сега некако дојде вистинското време, се наместија коцките за конечно да го снимам видео и за оваа песна на којашто сум и овој пат комплетен автор, вели Јордан Митев.

Во спотот учествуваат играорци од ансамблот за фолклор “Гоце Делчев” од Битола со нивниот кореограф Бранко Жежовски-Жежо кој е еден од најнаградуваните кореографи во Македонија и надвор од Македонија со неговиот ансамбал.

– Исто така, во проектот се вклучени и дел од музичарите коишто ме придружуваат на моите настапи. Ние Mакедонците сме народ со сопствена традиција, култура, фолклор, и сметам дека обврска, но и чест на секој македонски артист е тоа да го негува, претставува и надградува на најдобар можен начин, додава Митев.

И овој пат видеото го работеше долгогодишниот соработник на Митев, Зати од Охрид со кој има снимено доста проекти.