Пејачката Мадона е ограбена на фестивалот Коачела, каде крадци ѝ одзеле неколку вредни парчиња облека. Иако настапот со Сабрина Карпентер беше врвот на вечерта, поп иконата набрзо доживеа шок. Исчезнаа уникатни „винтиџ“ парчиња со непроценлива емотивна вредност, а полицијата верува дека станува збор за бизарен сплет на околности.
Враќањето на поп кралицата Мадона на сцената на славниот фестивал Коачела требаше да остане запаметено исклучиво по музичкиот триумф. Меѓутоа, откако се изгаснаа светлата, славната пејачка остана без дел од гардеробата и скапоцениот накит кои за неа имаат посебно значење. Мадона се огласи видно потресена, порачувајќи дека украдените работи за неа не се само модни додатоци, туку „дел од личната историја“.
Две децении по нејзиното легендарно деби на Коачела, Мадона се врати во голем стил. Овојпат, друштво на сцената ѝ правеше моментално најголемата млада ѕвезда, Сабрина Карпентер. Со заеднички настап двете пејачки го затворија вториот фестивалски викенд, а Мадона блесна во препознатлив стил – виолетов корсет, ракавици и мрежасти чорапи, додека Сабрина беше совршен контраст во бела чипка.
Сепак, веднаш штом заврши спектаклот, следуваше „ладен туш“.
Шок во хотелот: Каде исчезна багажот?
Полицијата во Индио потврди дека пријавата за исчезнат имот е поднесена во сабота, 18 април 2026 година, околу 19:32 часот. Според извештајот поднесен од претставникот на Мадона, скапоценостите последен пат биле видени на просторот на „Empire Polo Grounds“ нешто по половина два часот по полноќ.
Истрагата откри бизарна трага. Предметите се наоѓале на голф-количка која ја превезувала опремата до автобусот.
Полицијата не верува во плански грабеж
Иако првата мисла беше дека Мадона била мета на професионални крадци, полицијата засега има поинаква теорија. Според првичните резултати од истрагата, се верува дека двете торби со „винтиџ“ облека и накит едноставно паднале од голф-количката за време на транспортот низ фестивалскиот простор.
Вработените сфатиле дека багажот недостасува дури кога пристигнале во хотелот и започнале со истовар.
‒ Во овој момент нема докази кои би укажувале на намерна кражба насочена против Мадона. Повеќе ја разгледуваме можноста за губење на работите за време на транспортот отколку планско кривично дело ‒ соопштија истражителите.
Додека трае потрагата по „изгубеното богатство“, Мадона не го крие очајот. За неа, овие уникатни парчиња претставуваат години кариера и спомени кои не можат да се надоместат со пари. Пејачката понуди вредна награда за оној кој ќе ги најде и врати работите.
© Vecer.mk, правата за текстот се на редакцијата
