Украинскиот претседател Володимир Зеленски повторно ја посети линијата на фронтот, каде се сретна со војниците во близина на Бахмут, каде што им подели одликувања. Неговата посета доаѓа веднаш откако неговиот ривал, рускиот претседател Владимир Путин, најблиску се појави на фронтот на крајот на минатата недела, во посета на градот Мариупол, кој беше заземен од руските сили минатата година.
• Потребите на Украина за обнова и закрепнување пораснаа на 411 милијарди долари, објави Светска банка. Проценката, која заеднички ја направија украинската влада, Светската банка, Европската комисија и Обединетите нации, е зголемена од претходната проценка во септември, која изнесуваше 349 милијарди долари.
• Американскиот државен секретар Антони Блинкен рече дека иако политичката и материјалната поддршка на Кина за Русија е против интересите на САД, Пекинг не обезбеди значителна „смртоносна помош“ за Москва. „Додека зборуваме денес, не сме ги виделе да ја преминат таа граница“, рече Блинкен како одговор на прашање на сослушувањето на поткомитетот во Сенатот.
• Најмалку едно лице загина во југоисточниот украински град Запорожје откако руска ракета погоди станбена зграда, соопштија украинските власти. Во исто време пристигнуваат информации дека најмалку осум лица загинале во напад на руски дрон во регионот на Киев, соопшти украинската државна служба за вонредни состојби.
• Володимир Зеленски ги посети украинските војници во средата, во близина на градот Бахмут, на линијата на фронтот, и им подели медали на војниците за кои рече дека херојски го бранат суверенитетот на нивната земја.
• На видеото објавено на социјалните мрежи се гледа како украинскиот претседател им дели награди на војниците во нешто што изгледаше како магацин. „Чест е што сум денес овде за да им ги доделиме наградите на нашите херои. Да се ракуваме и да им се заблагодариме што го штитат суверенитетот на нашата земја“, рече Зеленски.
• Русија предупреди на „сериозна“ ескалација на украинската криза доколку Велика Британија испрати оклопна муниција што содржи осиромашен ураниум во Киев. „Ова е чекор кон понатамошна ескалација, а притоа сериозен“, изјави рускиот министер за надворешни работи Сергеј Лавров.
• Ризикот од нуклеарен конфликт сега е на највисоко ниво во последните децении, изјави вчера рускиот заменик министер за надворешни работи Сергеј Риабков, пренесе државната новинска агенција ТАСС. „Не би сакал да навлегувам во дебата за тоа дали веројатноста за нуклеарен конфликт денес е голема, но во секој случај таа е поголема од се што сме виделе во изминатите децении, така да се изразиме“, рече Риабков.
Извори: The New York Times | independent.co.uk | al-Jazeera | cnbc.com | CNN
Фото: Кабинет на претседателот на Украина
