Се сруши воен авион во близина на вториот по големина град во Мјанмар, Мандалај, при што загинаа 12 лица, се вели во соопштението на градската противпожарна служба на социјалните мрежи.
Авионот летал од главниот град Најпијадава до градот Пиин Оо Луин, и се срушил при слетувањето и се урнал на околу 300 метри од фабриката за челик, објави воената телевизија Мјавади.
Во авионот имало шест воени лица, како и монаси кои требало да присуствуваат на церемонијата во будистичкиот манастир, објавија другите медиуми.
Нема жртви на теренот. Пилотот и еден патник преживеале и биле пренесени во воена болница, според граѓаните и објавите на социјалните мрежи.
Сè уште не е јасно што ја предизвикало несреќата. Фотографиите на социјалните мрежи покажуваат дека страната на авионот е сериозно оштетена.