Полска пријави 29.978 случаи на новозаразени со коронавирус, што е најмногу од почетокот на пандемијата, покажуваат податоците на Министерството за здравство.

Уште 575 лица починаа од Ковид-19, со што вкупниот број на починати достигна 50.340.

Ситуацијата во Полска е полоша отколку за време на претходните врвови на пандемијата есеноска, бидејќи повеќе луѓе треба да бидат хоспитализирани, и покрај споредливиот број случаи, рече министерот за здравство Адам Ниџиелски.

Британската варијанта на коронавирус, многу позаразна од оригиналниот распространет вирус, сега е доминантна во Полска.

Низ целата земја се зафатени околу 75 проценти од достапните болнички кревети за пациентите заболени од Ковид-19.

Истото важи и за болничките кревети опремени со респиратори неопходни за сериозно погодените пациенти, рече премиерот Матеуш Моравиецки.

„Најтешкото е пред нас“, рече Моравиецки.

Други ограничувања поради коронавирусот, вклучително и затворање на училишта, хотели, културни институции и спортски објекти, се во сила во Полска од саботата, но новите ограничувања допрва ќе следуваат.

Според премиерот, в четврток ќе биде објавен нов сет на ограничувања за неделите пред и по Велигден.

makfax.com.mk