„Уапсените лица се обвинети за предавање на чувствителни технолошки информации на кинеската тајна служба, кои се употребливи и во воениот сектор“, се вели во соопштението на државното обвинителство.
Тројцата уапсени, двајца мажи и една жена, во моментот на апсењето преговарале за истражувачки проекти кои би можеле да послужат за модернизирање и зголемување на борбената моќ на кинеската морнарица, според обвинителите.
Членови на бирото за борба против криминалот ги уапсија Хервиг Ф,. Ина Ф. и Томас Р. во Дизелдорф и Бад Хомбург во западна Германија.
Брачниот пар Хервиг и Ина, по налог на Томас Р., кој бил во контакт со кинеската тајна служба МСС, преку нивната компанија оствариле контакти со истражувачки центри со кои е подготвен договор за соработка, што е вообичаено кога станува збор за соработка меѓу економијата и науката.
Конкретно, експертиза во областа на погонската технологија за воени бродови била преговарана со германски универзитет. Покрај тоа, ласерски уред е доставен во Кина по налог на MSS, кој спаѓал во извозните артикли што се користат во цивилниот и воениот сектор.
Германскиот министер за правда Марко Бушман рече, посочувајќи на неодамнешното откритие на руски шпиони во Германија, дека земјата е под зголемен напад од странски шпиони.
„Кој е активен во Германија како шпион и ги снабдува странските сили со материјал што потенцијално може да се користи за воени цели, мора да очекува решителен одговор од владеењето на правото“, рече Бушман.