Адвокатите на поранешниот американски претседател Доналд Трамп и високи раководители на неговата компанија „Трамп Организејшн“ („Trump Organization“) денеска поднесоа жалба оспорувајќи ја судската одлука во тужбата за граѓанска измама против него, поднесена од јавниот обвинител на државата Њујорк, соопштија светските агенции.
Адвокатскиот тим на поранешниот претседател го извести апелациониот суд во државата Њујорк за плановите да ја оспори пресудата од 16 февруари на судијата на државниот суд на Менхетен, Артур Енгорен.
Енгорен ги прогласи Трамп и неговите директори за виновни за голем број обвиненија за измама и ги казни со повеќе од 454 милиони долари, што најмногу влијаеше на Трамп, кому исто така му беше забрането да работи во Њујорк на три години.
Од Трамп не се бара да ја плати казната или да објави обврзница за жалба, но жалбата автоматски не го задржува извршувањето на пресудата, пренесе БТА.
Сепак, тој има рок до 25 март да обезбеди одложување, правен механизам кој го одложува извршувањето на паричната казна додека трае жалбата. За таа цел, Трамп мора да објави обврзница која ја покрива вредноста на казната. Сепак, неговите адвокати можат да побараат од апелациониот суд да одобри задржување без кауција или пониска обврзница.
Тужбата против Трамп беше поднесена во септември 2022 година од државниот обвинител на Њујорк, Летиција Џејмс. Според обвинението, компанијата „Трамп Организејшн“ дала лажни податоци за вредноста на својот имот за да обезбеди поповолни услови за кредити и осигурување.
© Vecer.mk, правата за текстот се на редакцијата
