Сириската влада ги повлече своите трупи од областите каде доминира друзиското население на југот на земјата, по неколку дена жестоки судири. Со ова беше прогласен и прекин на огнот во регионот.
Претседателот на Сирија, Ахмед Ал-Шараа, се обрати кон нацијата за првпат од почетокот на израелските воздушни удари врз режимските цели. Во својот говор, претседателот го промени досегашниот тон и директно ја обвини Израел дека сака да ја „разбие единството на нашиот народ“, наведувајќи дека Израел „континуирано ја таргетира нашата стабилност и создава раздор од падот на претходниот режим.“
Друзите се неотповиклив дел од сириската нација и гарантираме дека одговорност ќе сносат оние кои извршија злосторства против нив.
Вашите права и слободи се меѓу нашите највисоки приоритети. Не прифаќаме ниту домашни ниту странски обиди за раздор помеѓу народот.
Ал-Шараа нагласи дека Сирија се соочува со две можности: „или ќе се соочиме со Израел или ќе се фокусираме на внатрешни реформи.“ Тој додаде: „Ние не се плашиме од војна. Цел живот се бориме и го браниме нашиот народ. Но, интересот на Сиријците го ставивме пред хаос и разурнување.“
Ал-Шараа истакна дека посредници во прогласувањето на прекинот на огнот биле Соединетите Американски Држави, земјите од Заливот и Турција. Претседателот го претстави повлекувањето од југот како дел од однапред изготвен план и најави дека безбедноста во Суеида ќе биде доверена на локални фракции и племенски водачи, „во согласност со врвните национални интереси.“
Повлекувањето на владините сили од Суеида уследи по неколку дена жестоки судири, во кои бунтовничкиот Друзиски воен совет успеа да ги одбие армиските обиди за воспоставување контрола врз конфликтот меѓу друзиските и бедуинските милиции. Вмешувањето на државата во регион кој де факто беше под контрола на Друзите од уривањето на Асад, резултираше со директна израелска интервенција.
Охрабрени од протестите на израелските Друзи против масакрите и злосторствата на владини сили, Израел започна голема воздушна кампања поддржувајќи ги Друзите преку напади врз сириски воени цели. Во средата, овие напади беа проширени врз самата престолнина, уништувајќи ја зградата на Министерството за одбрана и погодувајќи ја претседателската палата на Ал-Шараа.
Властите и локалните Друзински лидери неколкупати се согласија на прекин на огнот, но секој пат истиот беше одбиен од Друзинскиот воен совет, предводен од Хикмат ал-Хијри, кој тврдеше дека нема да прифати мир додека цела Суеида не биде „целосно ослободена.“
Последниот прекин на огнот има поголеми шанси да остане на сила поради целосното повлекување на владини сили, но судирите меѓу локалните Друзински и Бедуински милиции може да предизвикаат нови вмешувања. Некои извори наведуваат и мобилизација на Бедуинските милиции за продолжување на борбите.
Голем проблем за долгорочниот мир е и приливот на извештаи за меѓусебни злосторства — провладини извори ги обвинуваат Друзите за масакри врз бедуинските цивили, додека Друзите тврдат дека владините сили направиле злосторства врз нив.
На социјалните мрежи се појавија фотографии и видеа за наводни злосторства, но има спротивставени тврдења за сторителите. На едно видео се гледаат десетици тела на погубени лица во болница.
Делуваме решително за да спречиме непријателски сили да се зацврстат на другата страна од границата, за да ги заштитиме граѓаните на Државата Израел и да спречиме штета врз друзиските цивили.
Нема да дозволиме јужна Сирија да стане бастион на терор.
До четврток наутро, борбите речиси целосно стивнаа. Според новинарката на Ал Џазира, Зеина Ходр, во Суеида владее „напрегнат мир“, но сигурност нема.
Во неколкудневните крвави пресметки загинаа стотици луѓе. Локален новинар изјави дека изброил повеќе од 60 тела по улиците на Суеида, а друг извештај посочи дека во една куќа биле пронајдени тела на цело семејство од 12 луѓе.
Додека и Друзите и владините сили се обвинуваат меѓусебно за злодела, најголем дел од документираните инциденти од Сириската опсерваторија за човекови права се припишуваат на владата. Од 374 потврдени жртви, 27 биле егзекутирани од страна на властите. Владините сили имаат најголеми загуби: 189 паднати во судири и уште 15 загинати од израелски воздушни удари.
Вистинската бројка веројатно е многу поголема, бидејќи увидите и пребројувањето продолжуваат.
Друзите се значајна заедница во Израел, со околу 150.000 членови од вкупно еден милион ширум светот, познати по тесните врски со еврејската држава. Над половина од светските Друзи живеат токму во Сирија, претежно на југот. Израелската влада често ги гледа Друзите како пример за интеграција, во спротивност со односот со Палестинците.
По ескалацијата на насилството, илјадници Друзи во Либан и Израел излегоа на протести во поддршка на своите сонародници во јужна Сирија. Во Израел, дел од нив дури ја пробија граничната ограда и влегоа во Сирија за да им помогнат. Протестите долж границата продолжија и наредниот ден, со повторени повици до властите во Ерусалим да се вклучат.
Самиот конфликт стави и САД во нелагодна позиција. Претседателот Доналд Трамп работи на нормализирање на односите со Сирија и последните санкции кон земјата беа укинати. Неколку дена пред судирите, специјалниот пратеник Том Барак во интервју за New York Times го спореди Ал-Шараа со Џорџ Вашингтон и изјави дека САД посредуваат во мировни преговори меѓу Сирија и Израел, со цел приклучување на Дамаск кон Абрахамските договори.
Но, острата нова реторика на Ал-Шараа кон Израел во четврток даде јасен сигнал дека овие мировни иницијативи се во ќор-сокак.
© Vecer.mk, правата за текстот се на редакцијата
