Во заедничка изјава, трите земји повикаа на искрен дијалог во согласност со Повелбата на Обединетите нации, додавајќи дека кубанскиот народ мора да биде слободен да ја одреди својата иднина.
„Изразуваме длабока загриженост за тешката хуманитарна криза што ја доживува кубанскиот народ и повикуваме да се преземат потребни мерки за ублажување на оваа ситуација и за избегнување дејствија што ги влошуваат условите за живот на населението или се спротивни на меѓународното право“, се вели во соопштението.
Администрацијата на американскиот претседател Доналд Трамп ги блокираше трансферите на пари кон Куба, им се закани на земјите што го снабдуваат островот со царини и ја стави Куба на листата на држави спонзори на тероризам.
Исклучително тешка ситуација
Шпанија, Бразил и Мексико ветија дека ќе „ја зголемат хуманитарната помош на координиран начин за да ги ублажат страдањата на кубанскиот народ“.
„Ја повторуваме потребата од почитување на меѓународното право во секое време и принципите на територијален интегритет, суверенитет и мирно решавање на споровите, утврдени во Повелбата на ОН“, рекоа тие.
Изјавата дојде откако шпанскиот премиер Педро Санчез ги угости бразилскиот претседател Луиз Инасио Лула да Силва и мексиканската претседателка Клаудија Шајнбаум во Барселона на меѓународен самит на левичарски лидери со цел мобилизирање против војната и крајната десница.
САД се спротивставуваат на режимот што е на Куба од 1959 година и во јануари го засилија економскиот притисок врз таа земја веднаш откако го собори венецуелскиот претседател Николас Мадуро, сојузник на Куба.
Трамп минатиот месец изјави дека „верува“ дека „ќе има чест да ја освои Куба“. Тој, исто така, зборуваше за „ослободување“ на земјата.
© Vecer.mk, правата за текстот се на редакцијата
