Американскиот претседател Доналд Трамп изјави дека очекува Илон Маск да открие милијарди долари кои биле проневерени и злоупотребени во Пентагон за време на ревизијата што ќе ја води милијардерот.
Ќе му кажам многу брзо, може за 24 часа, да го провери Министерството за образование... Тогаш ќе кажам, ајде да одиме во војската. „Ајде да ја провериме војската“, изјави Трамп за Фокс њуз, чиј извадок беше емитуван утрово, пренесе Ројтерс.
Американскиот претседател рече дека ќе најде милијарди, стотици милиони долари во измама и злоупотреба. Буџетот на Пентагон се приближува до милијарда долари годишно, соопшти агенцијата.
Во декември, тогашниот претседател Џозеф Бајден го потпиша законот со кој се овластуваат 895 милијарди долари за одбранбени трошоци за фискалната година која завршува на 30 септември.
Маск, кој Белата куќа го опишува како специјален вработен во владата, доби задача од Трамп да ги води напорите за намалување на бројот на федерални вработени во САД. Како дел од оваа иницијатива, соработниците на Маск се обидуваат да дојдат до доверливи податоци во компјутерските системи на различни владини агенции.
Критичарите велат дека напорите се веројатно нелегални, ризикуваат да се разоткријат доверливи информации и ефективно да се уништат цели агенции без одобрение од Конгресот.
Советникот за национална безбедност Мајк Волц денеска во посебно интервју предложи дека процесите на бродоградба на Пентагон би можеле да бидат област од особен интерес за Одделот за владина ефикасност и генерално го карактеризира Пентагон како полн со непотребен отпад.
„Се чини дека сè таму чини премногу, трае премногу долго и им испорачува премалку на војниците... Потребни ни се деловни лидери да влезат и целосно да го реформираат процесот на набавки на Пентагон“, рече Волц во интервју за NBC.
© Vecer.mk, правата за текстот се на редакцијата
