Десетици млади луѓе, меѓу кои и малолетници, биле експлоатирани, изгладнети и принудени со месеци да живеат во нехумани услови во Унгарија, каде што дошле, верувајќи дека ќе си обезбедат подобро утре.
Како што соопштија од полицијата, истрагата утврдила дека уште во 2013 година пет мажи и жени, сите наводно роднини, организирале група со цел да заработат искористувајќи ги социјално загрозените.
На удар на членовите на оваа организирана криминална група биле ранливи лица, во тешка материјална состојба, кои немале нормални семејни односи. Во најголем број случаи жртвите биле од прифатни центри, а осомничените им ветувале редовна месечна заработка од најмалку 250 евра, сместување и оброци, како и фиксно работно време од 8 часа, пет, понекогаш и шест дена во неделата.
Жртвите верувале дека ќе одат да работат во унгарска компанија, а кога конечно стигнале на целта, живееле во пекол. Жртвите ги изгладнувале, биле принудени да работат до исцрпеност, не добивале пари, ниту имале пристап до лекари. Тие биле сместени во дрвени бараки или подруми на куќи. Некои дури биле принудени да работат 24 часа на ден, додека не паднале од исцрпеност.
Според Романиа Инсајдер, жртвите секогаш биле превезувани од Романија во Унгарија од истите двајца членови на криминалната група. Сè изгледало совршено. Откако ќе стигнале на одредиштето, под изговор дека треба да ги завршат сите работни дозволи, им ги земале пасошите и сите други документи, за жртвите да немаат каде да одат.
Веднаш потоа биле однесени во сместување, а потоа на повеќето им станало јасно дека ништо не е како што е договорено. Тие биле донесени во објекти каде што условите биле нехумани и каде веќе престојувале 20 до 25 лица. Тоа биле претежно дрвени бараки, без мебел, или подруми на куќи. Таму ги држеле под клуч. Оттаму би биле носени во објекти каде што се преработувал отпад, каде што би биле принудени да работат континуирано од утро до вечер и уште подолго.
Жртвите трпеле и психичко и физичко насилство, особено на работа каде што работеле 12, 18, а понекогаш и 24 часа на ден, седум дена во неделата.
Во бараките немало основни услови за живот - сите биле неухранети, не можеле да посетат лекар во случај на болест, а многумина биле принудени да ги чистат бараките и подрумите откако ќе ја завршат смената во фабриката.
Според романските власти, за расветлување на целиот случај, под покровителство на Евроџастис, Романија и Унгарија склучиле договор за заеднички истражен тим.
На територијата на двете земји се извршени повеќе претреси при што се пронајдени 49.150.000 форинти (околу 120.000 евра), 5.990 евра, околу 350 грама накит, два автомобили, документи, два пиштоли, како и други докази.
„Исто така, при претресот во Унгарија, идентификувани се повеќе од 20 лица, најверојатно жртви на трговија со луѓе. Унгарските правосудни власти на 12 ноември 2024 година наредија притвор на седум членови на организираната криминална група“, е објавено.
© Vecer.mk, правата за текстот се на редакцијата
