Ерик Трамп, извршен потпретседател на „Трамп Организејшн“ и син на американскиот претседател Доналд Трамп, упати драматично предупредување до банкарскиот сектор: или адаптирајте се на новите технологии - или ќе исчезнете.
Во интервју за CNBC во Дубаи, дискутирајќи за брзиот развој на Обединетите Арапски Емирати како крипто-центар, Трамп изјави:
Современиот финансиски систем е расипан - бавен е, скап и застарен. Нема ништо што блокчејн не може да го направи подобро од традиционалните финансиски институции. SWIFT е апсолутна катастрофа.“
Тој остро го критикуваше глобалниот банкарски систем, нарекувајќи го „застарен“ и „неефикасен“, а неговите ставови резонираат со растечкиот број поддржувачи на децентрализираното финансирање (DeFi) и криптовалутите.
Ерик Трамп и криптовалутите: Од MAGA Cap до милионски биткоини
Трамп, кој во последните години беше чест гостин на Емиратите поради проширувањето на неговите проекти за недвижности, стана страствен застапник на дигиталните валути. На конференцијата Bitcoin MENA 2024 во Абу Даби, тој изјави дека очекува Биткоинот да достигне цена од 1 милион долари.
„Нашиот банкарски систем им е наклонет на ултрабогатите. Сфатив дека системот всушност е оружје против обичните Американци - без разлика дали им недостасуваат нули на сметките или носат црвена капа со натпис „Да ја направиме Америка повторно голема“. Затоа се префрлив во светот на крипто.“
Во вторник вечерта, биткоинот се тргуваше по цена од околу 95.357 долари, иако пазарите на криптовалути забележаа голема нестабилност поради глобалната неизвесност и трговските тарифи наметнати од претходната администрација на Трамп.
„Банките се диносауруси, а криптовалутите се комета“
Трамп ги истакна предностите на DeFi системот, кој овозможува директни, брзи и евтини трансакции без посредници:
„Можете да отворите која било DeFi апликација и веднаш да испраќате пари, без трошоците и непредвидливоста на традиционалното банкарство.“
Иако големите банки како „Џеј-Пи-Еј Морган“ и „Голдман Сакс“ воведуваат свои блокчејн мрежи и бироа за крипто тргување, Ерик Трамп тврди дека ако не дејствуваат навреме, ќе бидат избришани од мапата за 10 години.
Семејството Трамп и крипто империјата
Администрацијата на Трамп активно промовира нова ера за крипто-индустријата. Доналд и Меланија Трамп веќе ги лансираа своите „мим“ криптовалути, што предизвика загриженост кај експертите за етика за можни судири на интереси.
Семејството Трамп стои и зад платформата „Ворлд Либерти Фајненшл“, основана во соработка со милијардерот Стив Виткоф, специјалниот претставник на САД за Блискиот Исток. Ерик Трамп и неговиот постар брат Доналд Трамп Џуниор го објавија лансирањето на стабилна криптовалута поврзана со американскиот долар, како и основањето на компанијата за рударство на биткоини „Американ Биткоин“ во март оваа година.
ОАЕ – иднината на крипто-валутите и клучен сојузник на Трампови
ОАЕ продолжува да привлекува крипто инвеститори, стартапи и берзи благодарение на про-бизнис законите и владината поддршка. Администрацијата на Трамп често ги фали односите со лидерите од Заливот, сметајќи ги за клучни партнери на пазарите во развој.
Изјавите на Ерик Трамп доаѓаат пред планираната посета на Доналд Трамп на Заливот од 13 до 16 мај, за време на која тој ќе ги посети ОАЕ, Саудиска Арабија и Катар. Тоа ќе биде прва посета на американски претседател на Емиратите од 2008 година.
© Vecer.mk, правата за текстот се на редакцијата
