Од почетокот на јули, областа Калабрија е зафатена од серија разорни шумски пожари. Поради тоа, локалната полиција реши да користи дронови со камери со висока резолуција и можности за термичка слика.
Полицијата соопшти дека дронот во конкретниот случај открил топлинска аномалија. Тие објавија видео на кое се гледа како насилникот на мотор бега од огнот што го подметнал. Кога забележал дека го снима дрон, се обидел да фрли камења кон него, пренесува CBS.
WATCH 🚨 Police drone caught a suspected arsonist in Calabria, southern Italy, during the widespread wildfires in Sicily and Sardinia. pic.twitter.com/wuawYTFXsB
— Insider Paper (@TheInsiderPaper) July 27, 2023
Операторот на дронот го следел човекот до изолирана фарма, каде локалната полиција уапсила 47-годишен локален жител. Полицијата утврдила дека се работи за лице со историја на ситни кривични дела. За целиот случај се огласи и гувернерот на Калабрија, Роберто Окиуто.
„Калабрија е цивилизиран регион, има и некои имбецили кои одат да палат оган во вревата, како овој пироман што го фативме вчера. Од каде доаѓа, од пештера?“, праша Окиуто. Се нагласува дека регионот располага со 30 дронови за следење на состојбата со шумските пожари.
Тој најави „нулта толеранција“ за пироманите. Шумските пожари беснееја низ Медитеранот ова лето, понекогаш поради подметнување пожар, или често поттикнати од рекордно високите температури и силните ветрови. Во Италија пожарите предизвикаа голема штета на профитабилниот земјоделски сектор, уништувајќи илјадници хектари маслинови градини и други култури.
© Vecer.mk, правата за текстот се на редакцијата
