Единствениот преживеан од падот на воен хеликоптер во јужен Перу, во кој загинаа 15 лица, беше мало куче кое му припаѓало на полковник кој бил меѓу патниците, изјави извор од воздухопловните сили за АФП во вторник, објави Араб њуз.
Спасувачите го пронајдоа кучето меѓу остатоците од хеликоптерот Ми-17 што се урна во неделата. Лежеше до телото на неговиот сопственик, полковник Хавиер Ноле (50), кој беше на летот со сопругата и двете ќерки.
„Тоа е миленичето на полковникот Ноле; тој е единствениот преживеан“, изјави изворот, кој побара да не биде именуван, за АФП.
Локалните медиуми објавија дека кучето изгледало добро, но било однесено во ветеринарна клиника како мерка на претпазливост.
Седум деца беа меѓу 15-те лица кои загинаа кога рускиот хеликоптер Ми-17 се урна во регионот Арекипа. Хеликоптерот неодамна се користеше во операции за спасување на жртвите од поплавите во областа.
Полетуваше од градот Писко, во регионот Ика. Спасувачите ги лоцираа остатоците од авионот во понеделник, на нешто повеќе од 300 километри оддалеченост, во близина на Чала Виехо, град во близина на тихоокеанскиот брег на Арекипа.
Воздухопловните сили започнаа истрага за да ја утврдат причината за несреќата.
© Vecer.mk, правата за текстот се на редакцијата
