Во писмото, добитниците на Нобелова награда му се заблагодаруваат на Трамп, кој го покрена прашањето минатата недела за време на телефонскиот разговор со белорускиот претседател Александар Лукашенко, и го повикуваат да направи повеќе, објавува Ројтерс.
„Со почит ве повикуваме да продолжите со вашите активни напори за обезбедување на итно ослободување на сите затвореници на совеста во Белорусија. Нивната слобода не само што ќе ја врати правдата за поединците, туку ќе го отвори и патот кон помирување и дијалог“, се вели во писмото на Нобеловците.
Потписниците се добитникот на Нобелова награда за мир Оскар Аријас, добитниците на Нобелова награда за мир во литературата Светлана Алексиевич и Херта Милер, како и 16 добитници на награди за физика, хемија, медицина и економија.
Тие, исто така, повикаа на прекин на политички мотивираниот прогон за да се олесни враќањето на Белорусите кои избегаа во странство во голем број кога Лукашенко ги задуши масовните улични протести по спорните избори во 2020 година.
Изненадувачката интервенција на Трамп минатиот петок дојде неколку часа откако Дмитриј Болкунец, белоруски опозициски активист во егзил, му испрати е-пошта на американскиот претседател барајќи од него да го покрене прашањето за белоруските затвореници на самитот во Алјаска со рускиот претседател Владимир Путин, чиј близок сојузник е Лукашенко.
„Имаме намера да ве номинираме за Нобелова награда за мир ако помогнете во ослободувањето на белоруските политички затвореници“, напиша Болкунец во е-поштата.
Трамп, кој ја презема заслугата за решавање на шест војни, не ја криеше својата желба да ја добие наградата.
Подоцна истиот ден, на пат кон самитот во Алјаска, тој објави на социјалните мрежи дека имал „прекрасен разговор со високо почитуваниот претседател на Белорусија“, во кој му се заблагодарил на Лукашенко за ослободувањето на 16 лица и разговарал за ослободувањето на уште 1.300. Тој додаде дека со нетрпение очекува да се сретне со Лукашенко.
© Vecer.mk, правата за текстот се на редакцијата
